2013-01-03

端木鳴-梁振英做特首,等於搵陳冠希照顧你女友

原文連結
| 分類: 政治改革,最新文章綜覽 |

(原載於:作者FACEBOOK PAGE

其實點解要反對梁振英?

 

第一,呢條友過去一年,一路都講緊大話,而最嚴重嘅係,佢響飯局同記者講自己冇僭建,之後選佢響個電視辯論度大大聲話唐英年「僭建唔係僭建問題,係誠信問題」。

實情係,佢唔單只有僭建,而且係有好撚多僭建。有個僭建花棚佢賴上手,點知俾人踢爆係佢入伙之後起嘅,咁佢就賴老婆;佢明知間屋有個僭建地下密室,到佢想選特首,知道可以用僭建攻擊唐英年,於是就就好似藏屍咁揾磚封住,屋宇署去查嘅時候佢唔出聲,到知道紙包唔住火嘅時候就夠膽死話封咗個僭建就「唔存在」。

封咗就唔住在?你揾膠紙封住你條女把口,唔通佢個口就唔存在?佢仆街到去立法會答問題嘅時候,俾人質問,就話「我記憶中我冇講過自己冇僭建」。跟住俾人hi到上天花板,就響度死兜,話佢係話佢響選舉時冇講話冇僭建。

 

佢咁記得自己選舉時冇講話冇僭建就更仆街。佢明知自己有問題,所以唔講,但係就大大聲指責對手同一樣嘢,響度賊喊捉賊。以厚顏無恥嘅程度嚟講,佢都算係極品中嘅極品。

眾所鳩知,一次不忠,百次不用。梁振英呢條粉腸,唔係一次,而係一而再,再而三咁對住公眾同埋成個議會講大話。咁嘅人,就算佢跪住咁雪地裸求原諒,都唔應該原諒。

 

大家唔好忘記,梁振英唔係高登admin,而係香港政府嘅總admin。成個香港嘅幾萬億公帑點用、十幾萬公務員點做、警察點執法、律政司告邊個、房屋政策、土地政策,全部都睇行政長官頭,所以佢會有好多位可以同地產商、強國富豪、中資企業勾結,同埋好容易俾佢自己同親信上下其手。一個掌握香港最大權力嘅人,誠信點可能唔重要?

俾一個誠信破產嘅人做行政長官,就好似揾陳冠希幫你照顧你條女一樣咁危險。而家梁振英仲響度吔文吔武,佢班梁粉日日響度鳩up,叫大家向前看,俾個機會梁振英做實事。向前看?試下俾陳冠希照顧你條女啦。

(網絡廣傳圖片)

 

反對梁振英有用咩?

 

有好多五毛同白痴話,俾你真係攪到梁振英下台,咁邊個做?會攪到香港權力真空喎。

下下有少少做錯就要人下台,咁唔掂喎。

仲有,梁振英冇得撈,下一個又一撚樣係官商勾結、一撚樣係攪香港被融合,有咩用?

 

第一樣,香港而家冇人咩?梁振英唔做,大把人做到。同埋梁振英呢個人本身已經係最仆街嘅選擇,你換邊個上去,都好難仆街過佢。就好似我迫你要人生教練Winnie,你唔係諗住換過個最再差得過佢下嘛?

 

第二樣,梁振英唔係做錯少少嘢,而係犯咗一個根本嘅大錯──公然向大眾同埋議會三番四次講大話。響一個進步少少嘅民主社會,咁樣做嘅政客一早就要彈劾落台。

 

第三樣,如果你唔相信政治人物係有個人質素嘅分別,咁就唔撚洗選舉喇,求其抽簽抽個人做都得啦,美國人駛乜響奧巴馬同羅姆尼二選一、台灣人唔駛馬英九同蔡英文二選一。而你第時結婚,都唔駛揀啦,我求其俾個稻中咁樣嘅女你都得啦。

 

大家唔好忘記,反對梁振英,只係最迫切要做嘅第一步,而最最最重要嘅係,我地應該捍衛我地作為香港人嘅生活方式,同埋爭取一個更公平、更加能夠代表民意嘅真正普選制度。只有真正普選,先至能夠對抗大陸化同埋地產霸權嘅禍害。

你唔好話呢啲嘢唔關你事呀,你上高登、上Facebook上得咁過癮,係因為而家香港仲有些少言論自由,你見強國有得俾你響論壇hi政府咩?強國有得上fb咩?

 

你去報JUPAS,香港啲大學,大陸人比例愈嚟愈多,香港學生對學位比例比起幾年前仲低咗,即係話大學仲難入咗,香港啲大學根本都唔係服務香港人,你覺得公平咩?

仲有,而家樓價同租金升到hihi,啲樓都唔係人住,係用嚟炒嘅。你打份萬幾蚊嘅工,想獨立生活,有少少空間可以睇下愛情動作片,或者帶女仔上嚟坐下?想創你個心,而家一間劏房都租五六千蚊。一個社會嘅市民有個安身立命嘅地方,唔係咩奢望掛?你問自己,唔通你冇努力過咩?

你自細聽話,讀書、考試、升學、搵工、返工、進修、返工、進修,安份守己,結果連搵個地方落腳都唔得。點解?因為個制度俾幾個大地產商玩撚晒,政府就揸地土地供應,由得地產商抬價,舊區呢,就有啲畜生地產收樓收到人心惶惶,又火燭,又玩恐嚇,點解?

 

仲記唔記得反國教嗰陣,最受巴打歡迎嘅影音網站thisav.com全版呼籲大家支持學民同學?仗義每多狗衝輩,關心香港,巴打義不容辭。

元旦遊行就行完,梁振英唔會即刻落台,但我地如果唔ger住佢,佢就可以安枕無憂,繼續佢嘅大陸化工程。我地永遠唔知幾時會真正將佢推落台,亦唔知幾時可以真係有普選,但肯定嘅係,你唔爭取,就一定冇。溝女係咁,爭取公義都一樣。




No comments: