2013-02-15

【輔仁媒體】韋健:陳淨心:小組討論反面教材 (1852)

作者: 韋健

(原載於:http://waikin2000.blogspot.hk/2013/02/blog-post_14.html

是咁的,由歲首到年終,我哋睇關於愛港力嘅新聞,都話畀我哋聽,愛港力係一個和平、理性同非暴力嘅組織。但係事實上,佢哋只係卑鄙無恥、下流賤格、巴渣潑辣嘅義和團。單係發言人陳淨心,已經展現到佢嗰種潑婦嘅形象。我睇完情人節嘅《議事論事》之後,我淨係識得笑,唔單止係大笑,重要係恥笑,好似咁樣:

咁樣:

同埋咁樣:

 

======================

好啦,廢話講完啦,今次我嚟係講陳淨心响《議事論事》嘅一舉一動。我唔講佢嘅立場,淨係睇佢今次嘅言行,唔單止無展示到佢所謂嘅和平、理性同非暴力,重將火爆潑婦同低能井底蛙嘅形象發揮得淋漓盡致。無禮貌之餘,重唔尊重人、問非所答、爆粗伸指,當主持、其他嘉賓同我哋幾百萬位觀眾透明。有佢喺公開試做你組員,你肯定無運行。

議事論事FB PAGE 圖片

 

驕傲狂妄、目中無人

首節開始後約九分鐘,陳淨心被問到「你將來會參選?」嘅問題,佢無直接回應問題,而係只係怒睥梁國雄,嘴刁刁噉扮神氣:「我只係睇唔過眼而家有尐政客呢,喺度搞搞震。」當主持李鵬飛質疑佢個言論,佢無停止發言讓畀李鵬飛,你有你講,佢有佢做,重要大show「威水史」:

我記得細個嗰陣時呢,我阿爺呢,我爸爸媽媽呢,喺香港呢,係屬於上一代嘅人,係有……係有一股建設嘅力量嘅。咁點解而家香港會有一班政客喺度搞搞震,為反而反,阻住政府做嘢,而導致一股破壞嘅力量出咗嚟。

之後黃之鋒回應陳淨心嘅言論,佢唔係虛心聆聽,而係繼續扮神氣、望向第二邊。人哋啊劉健儀同蔣麗芸,即使同黃之鋒年紀相差有幾大、意見有幾不合,都識得尊重對方,臉帶微笑,望住佢靜心聆聽。而跟住梁國雄想同蔣麗芸嘈交,都先畀劉健儀插一插嘴,呢個先係真正嘅君子風範。

陳淨心一番嘴兒刁刁、抬高自己、貶低人哋嘅話,稍微有尐禮貌嘅人係唔會輕易講出嚟嘅。加上佢當主持無到、壟斷發言,(當然,公開試考官唔會出聲,除非你壟斷發言太耐),呢種目中無人嘅態度,如果出現响公開試之中,肯定必肥無疑。《聖經》有講:「驕傲在敗壞以先,狂心在跌倒之前。」考評局話過:「壟斷發言會被給予較低分數。」各位學子要切記切記。

 

答非所問、知識貧乏

第二節,當陳淨心被邀請為政治鬥爭現象嘅形成發表意見,佢無解釋成因,反而講出與題目無關嘅說話:

我想問吓你哋……香港電台,咁你哋嘅立場係,支唔支持港獨呢?插支港英旗出嚟,咁係有乜理由辦法唔係誤導市民,以為港獨有討論嘅空間,而導致而家香港嘅分化。

即係咁,假如响小組討論,你問一位考生校園欺凌嘅成因,佢就答:「我想問吓你呢,咁你嘅立場係,支唔支持校園欺凌?你講呢句出嚟,咁係有乜理由辦法唔係誤導其他組員,以為校園欺凌有容忍嘅空間,而導致而家校園人際關係嘅分化。」你覺得點樣?唔怪得陳淨心呢番話一出,就畀李鵬飛同柳俊江一句KO。

重有,佢打斷黃之鋒發言,人哋黃之鋒好心畀你講,佢居然講出以下膠論:

呢個係公營電台啊,呢度係中華人民共和國香港特別行政區嘅公營電台,你可唔可以搵(一個人去)CNN走……搵個人上去講加州獨立?

唉,呢個人連常識都無,點出嚟做愛港力發言人啊?都係梁國雄講得最啜核:「CNN係國營電台嚟㗎咩?」好心陳淨心上電視之前惡補一下常識啦。考生如果知識貧乏,以為安徒生發明咗電燈、愛迪生寫過故仔,到時畀人插就唔好怪人哋踢爆你。

《議事論事》截圖

 

爆粗伸指、醜態盡現

節目當中,佢一直手指指,指住黃之鋒。之不過人哋細過你,唔夠你辣,都唔使噉蝦佢㗎。你噉指,人哋只會話你欺善怕惡、毫無風度,考官都睇唔過眼。另外,佢一句「你都唔係人嚟㗎你!」,擺明係人身攻擊,公開試勿用。成個節目,我唔見蔣麗芸指住人大開怒火,而見到陳淨心潑婦罵街嘅醜態。喂!你著住愛港力件衫,幾百萬觀眾都喺電視面前睇緊你㗎。

最離譜嘅,梗係佢爆咗呢句:「我係咪建制派關你_事呀?」爆粗喺考試中絕對唔允許嘅。啊陳淨心!你係咪建制派當然關我事啦,至少你令到我要聽你呢句話,同因為你而打呢段評論,簡直浪費我人生嘅一段時間。我認真噉講句,如果一個人覺得自己所屬嘅群體有歸屬同自豪感,就當然會公開承認自己嘅身份。譬如話,我係耶青,就會同人承認信仰;我係獨_,就會响情人節唱「其實獨_一個更開心」;我係青年民建聯成員,就會宣傳民建聯。連建制派身份都要迴避,係咪想話畀我哋七百萬人聽,你以建制派為恥嗎?

一束原屬陳淨心嘅小花,就噉樣被遺棄咗,陰功~(「我哋係香港人,唔係中國人。」相片)

 

綜觀以上火爆言行,我覺得若果佢喺小組討論,唔單止令自己肥佬,重累埋其他組員,害己又害人。所以為咗自己、同愛港力嘅著想,都係盡早收山、睇一睇心理醫生、同食返一劑靜心口服液好。既保存愛港力嘅聲譽,又唔使為梁振英幫倒忙,何樂而不為?



原文連結