2013-02-19

【輔仁媒體】向東一江春水:「選議員?大家呢,仲係要選,民建聯∼∼∼」 (576)

作者: 向東一江春水

內容引述民建聯成員馬恩國粗言穢語,慎入

 

「為左香港繼續前進,撐社民連,上街!撐人民力量,上網!撐公民黨,上COURT!撐事旦男,舉牌!撐蕭若元,拍肉蒲團!選議員? 大家呢,仲係要選,民建聯 」---曾鈺成立法會選舉論壇 2012

是日立法會議員梁國雄於政制事務委員會會議大戰民建聯司法及法律事務副發言人,兼山西省政協委員,兼香港專業人士協會副主席,兼執業大律師馬恩國。信不信由你,經此役後,香港的普羅大眾,基層(偽)中產,一定係撐馬大狀多過長毛。此役可謂繼蔣麗芸後,再次突顯出民建聯作為立法會第一大黨,在招攬黨員方面,對香港人的低B政治心態可謂掌握得爐火純青。

(Messiah2048 Youtube 片截圖)

 

首先講馬大狀在反駁長毛時所用的語言。會議本身以廣東話進行,然而馬大狀卻故意用英文反駁長毛,分明就是利用香港人的祟洋心態來顯得自己高人一等。廣東話雖然是大部份香港人的母語,在香港奇蹟地卻從來是次等語言。香港家長為子女選校,由殖民地時期開始,從來都是英文中學為首選。近年愈來愈多中學更索性以普通話教授中文,廣東話在社會地位日益低微。馬大狀在本來以廣東話進行的會議中用英文反駁長毛,在不少香港(偽)中產╱師奶眼中,正是高人一等的象徵,而用廣東話既長毛,加上佢平時係議會扔野嗌交既形象,就更顯得係一個等被馬大狀呢位高等華人教訓既地痞流氓。

而馬大狀所講既英文,是不折不扣的港式(偽)中產Chinglish。發音不準之餘,中英夾雜,卻又神氣得很,例如:「其實Civil War既definition is wat, it's a dictionary hea! A war is fought between di分groups of people which live in a sam country! 」(正解: In fact the definition of civil war is this, it's here in dictionary: A war fought between different groups of people who live in the same country!) 如此英文,莫說在西方議會,在殖民地時期的香港立法會,由一個大律師講出來,一定引起國際笑話,為世人恥笑。但不要忘記,今天香港已回歸祖國。而馬大狀的口音口吻,更和今天不少香港(偽)中產吻合:平時在街上見到師奶用英文教訓菲傭或者子女,不正是這樣的嗎?這班中產聽到馬大狀的英文,會很有代入感,很有共嗚的。

 

而以下馬大狀既發言,更是句句對準香港人的心態和弱點:

1. 「我係山西省政協,但我都係澳州大律師喎!我係澳州廿年喎!」

首先,以一般香港人的政治智慧,連政協究竟是什麼都不會知道,更遑論明白當政協的政治意義。有些人更會覺得:「做政協有咩問題?為國出力嘛!」從李旺陽事件,香港人天真地一窩蜂追著政協代表他們敦促大陸當局跟進便可得知。所以長毛指出馬大狀是政協,他直認不諱。至於下一句既澳州大律師,香港人就梗係明啦!外國留學,專業人士,大律師,實係好人,實係有料,實信得過,CCTVB劇集教架嘛!:o)

2. "I have got the credential. You don't! I have got a university degree. You don't! I have got an Australian qualification. You don't!"

呢段就簡直係高潮位。有專業,有大學學位,有外國大律師執業資格,正係香港人眼中標準既成功人士!長毛呢個搞政治,為反而反,成日示威,扔蕉大嗌,又霸公屋,不務正業既人,點同馬大狀比呀大佬!長毛有十幾萬人投票俾佢做議員?有民意授權?呢D係香港人眼中算係咩呀!Come on James!你係港女,你揀邊個呀?你係老母,會叫個仔學邊個呀!所以馬大狀係會議中以君臨天下既儀態黎教訓長毛,簡直完全看透港情。犀利!

3. "You are not fucking Chinese!"

此句重點在fucking。如前所講,英文(今日,同埋普通話)係香港係高等語言。所以用英文粗口鬧人,係香港係有道德免責權。睇電視電影就知,明珠台播Men in Black,成套戲fuck黎fuck去,一單投訴都冇;無線播秋天的童話,出左句仆街就投訴到你仆街;西片有個fuck字就頂多IIB級,港產片有個屌字就一定三級。如果馬大狀講:「長毛你係撚中國人呀!」形勢就唔同。但係佢醒,識講fucking,咩事都冇,香港人受呀,吹咩。

 

所以話,民建聯搵得馬大狀,係有原因。呢種黨員係香港不知幾有market。而家俾得機會佢發揮,相信民建聯遲早會派佢出黎參選,仲應該會用佢黎撼公民黨。香港人選議員?聽曾鈺成講,投民建聯啦!香港一定進步。掂呀!:0)

 



原文連結