2013-04-24

【輔仁媒體】林婷欣:明明有溫書點解係都要扮無溫 (1705)

作者: 林婷欣

(原載於:http://hellotingyan.com/blog/?p=339

(photo via cc Flickr user English106)

 

「我真係無溫書。」

「我等爛grade咖喇。」

「今個sem放棄喇。」

「GPA?食得咖?」

 

呢幾句說話大家都聽唔少、講唔少,包括我。中學雞時期身邊總會有幾條假膠,明明好勤力,然後死都要扮晒野話無溫過書,最後又考得高分過人。升左大學,大個仔大個女啦,點解仲要用埋晒D咁既屎橋以為無人睇穿你?可能有人覺得塑造自己唔洗溫書都可以好高分既形象,係一件好威威既事。

呢班假膠唔知點解好中意周圍同人講:「你信我啦!我真係無溫書咖!尋晚成晚都係度打機,乜都唔識,點算好?」當大家討論題目果陣,佢又可以應對如流,真係吹漲。到派卷果陣,佢梗係不負眾望拎好高分啦,於是佢又同大家講:「唉呀,我真係無溫過咖,撞彩咖乍。」事實上,條友已經唔知比人撞過幾多次係圖書館死溫爛溫,見到人就係度扮玩緊電話,話自己一直發夢,無溫過咖無溫過咖。

的確有人天生醒目,唔洗點讀都可以考到好成續。不過扮天才唔係咁易,唔洗幾下都露晒底,個個都心裡有數,只係見你自high得咁開心,先至配合下你,讚你兩句:「哇!你真係好勁啊!不如教下我啦。」大哥大姐,比個靚面你所以先唔踢爆你乍。

緊張GPA,緊張成績,都唔係咩羞家既事,點解唔可以大大方方認左佢,玩埋晒D小學雞招數只會令大家睇唔起你。更何況,大家都知道,只有你以為我們不知道……

 



原文連結