2013-06-09

什麼人訪問什麼人:給愛國愛港的人:愛的可能 (223)

近兩年,香港社會忽地漫出一片「愛」字頭紅潮;當中先鋒,叫愛護香港力量。

2011年初成立的愛港力,自稱「立場鮮明」,以「愛國愛港,無私奉獻」為號出現於大小遊行論壇。愛港力自成立以來被視為紅色愛國組織,或中共政權的維穩棋子;其激進行徑令他們被指為激進左派,行動召集人陳淨心更被形容為「再世江青」;輿論繼續罵,他們繼續密鑼緊鼓反佔中,以民生為號,面朝市民大眾。

愛港力所到之處皆風波四起,語言論調亦不為以民主為念的人所接受,討論難續。既然尚無證據指證其紅色背景,扣帽子貼標籤亦無助釐清真理,倒不如揭開紅幕,正面應對,直視這些以「愛」為號的人,細察他們的所思所念。

在激進粗野背後的「愛字頭」

陽光燒一地的下午,筆者走到愛港力指定的樓上咖啡店準時赴會。為了此次訪談,近月來在愛港力活動中面邀、電郵函約數次,終得召集人陳淨心點頭。走到咖啡店,才知悉將有六位愛港力成員與單刀赴會的筆者對談,當下心神稍亂;然而,當一個個脫下制服的成員對坐眼前,卻令人感到一種幾近熟悉的港味﹕席上看上去年屆30至50歲的五男一女,T-shirt短褲,平凡一如走道上的群眾,沒兇形惡相,來到也是抓個電話以手點琢。我掀出幾期以「調查報道」愛港團體為封面的周刊,說他們與親中組織關係密切,陳淨心更曾任愛國團體助理等,他們看得咧嘴笑,「全部都老作啦!都無訪問過我哋!」

筆者乘勢問,哪到底愛港力如何運作?與另一愛國組織愛港之聲又是何種關係?負責公關的唐先生稱,他們與愛港之聲或其他愛國團體並無關係。愛港力現今活躍的核心成員約有五六人,筆者亦能從活動中認得一二。愛港力多在網上聯絡,不定期舉辦活動,例如去年12月30日的挺梁遊行,就是在網上號召成員,再以閱報所得和網民提供的電郵地址,邀請各大團體參與,唐先生笑稱他們似「亂石投林」,「佢哋嚟就嚟,唔嚟咪算!都無諗到有咁多人嚟!」他又稱,不少團體均向他們提供支援,有區議員亦擺放他們的單張,助其宣傳。至於經費,則是靠網上向同道中人募集。截稿前爆出有人質疑愛港力並無註冊,筆者及後詢問他,愛港力有否向政府註冊?唐先生未有正面回應,只謂一句:是否註了冊才能搞社運?

「我哋一啲都唔激」

言談間,陳淨心來了。那個印象中趾高氣揚的「潮州辣妹」,撲了淡妝,穿一件黑色TO-FU公仔T-shirt,手攬奶綠布袋,匆匆趕至,「對唔住,出面好塞車」。筆者提議先拍照,陳淨心隨即在布袋中掏出紅白龍紋戰衣,兩手使力一揮,戰衣「服」的一聲應聲展開,她再以Mark哥姿態橫披縱穿,變身成大眾熟悉的「陳淨心」。「(關於你哋呢個機構……)唔係機構,係網民組織。我哋一直都喺網上召集人出嚟愛國愛港」,「(咁你嘅黨員……)唔係黨員,係組織嘅成員」。筆者開口即碰壁,亦碰出了陳淨心對組織定義路線有着敏銳的嚴謹。筆者對她說,在主流傳媒眼中,她的形象頗負面,她聽後忽綻出一個少女的微笑,「我個人本身就無咩所謂,你唱我鬧我,另一個角度睇,其實都係注視緊我。上次去嶺南,有幾百個學生嚟咗,要一睹我嘅風采……無論反你又好撐你又好,即係表示佢係重視緊你,聽緊你講嘢,佢可能自己會反思下。一個人最慘,係講咩都無人睬你」。吸引眼球的邏輯,她顯然掌握了。

然而以粗暴激進吸引眼球又是否有效?愛港力眾成員均認為,自己「一啲都唔激」,「人民力量、社民連仲激啦!」當下指出組織活動並無違法,依足警方指引,不會「推鐵馬,衝出馬路」。顯然,愛港力與筆者對其「激進行動」的理解截然不同:在我們看來的無禮粗暴,對他們而言是為義理而迫出的真純激情,「是激到你不發火都不行!」成員李小姐說。因為己身的信仰,即使這束「火」燒得過熱甚至灼傷他人,也是合理的,「一定係有人挑釁我哋,我哋先至會作出反擊!」由是,她不怕與長毛互罵、不怕站在佔中論壇桌上「手指指」,「我哋就係要反對呢班政棍,撕破佢哋嘅假面具!」,「班政棍做一啲嘢係禍港嘅,就無討論空間!」這束否定討論餘地的火,仰仗的,是以我為本的正義。

一切由民生問題燃起

勇於向「政棍」宣戰的陳淨心,言語間常說自己是「一個普通市民,唔係專業政客」。她在香港土生土長,婚後當全職主婦,閒時看看新聞,自言在組成愛港力前對政治無感,惟近年卻愈走愈前,因覺得香港很亂,「我唔睇時事,唔識政治,係睇到𠵱家香港真係亂」,在她看來,當下政客們在「搞亂社會」,「最打中我心臟的,是外傭居港權。」

訪談中,愛港力成員與筆者侃侃而論的,包括雙非嬰兒、外傭居港權、全民退休保障、最低工資、中國與香港的經濟發展等問題,由港人資源、本土利益衍生的民生議題出發,及至國家民族遠景。在其免費派發的兩頁反佔中特刊中,雙非問題正是批判泛民的第一武器,陳淨心認為,無論是雙非問題或外傭居港權,都危害了香港人的根本利益,始作俑者是泛民「政棍」,特別是公民黨,「十八萬嘅雙非嬰兒,搶我哋嘅醫療同福利。香港人嘅醫療同福利應該係歸番我哋香港人,啱唔啱先?你搞完雙非,你又外傭?話問題唔大?外傭問題係災難……佢哋搵到嘢做就最低工資,搶我嘅飯碗,搵唔到嘢做就去攞公屋攞綜援!咁到時我哋班納稅人咪養呢班人囉?」無論莊豐源案還是外傭居港權,在愛港力看來都是泛民律師幫「外人」打官司以撈政治本錢和賺律師費,置港人利益不顧,「人權、民主、自由,唔係呢啲嘢!我哋要保障番自己」。筆者由是翻讀莊豐源案的判辭,發現當時入境處長向法庭承認沒有迹象顯示其敗訴會導致大批內地人立即湧入香港。何以情形後來失控?雙非湧港與中港政經文化差異和融合矛盾又會否有關?當真是一、兩個無能政棍足以挑起的風波?

問心念民生的他們,怎樣才算好政府?陳淨心強調自己並非梁粉,「我係支持一個出心去幫香港人謀福祉嘅特首」,「好政府,要睇佢做嘅事、政綱,例如長者津貼,係想幫長者,但梁國雄走去拉布令長者無咗兩個月嘅津貼!呢啲咪政棍囉!政府想做番啲嘢你又唔畀佢做」。此言一出,又開啟了全民退保的話題,「呢啲福利社會制度根本上已經證明咗係西方國家、歐洲國家係行唔通㗎啦!」在愛港力看來,全民退保根本是災難;一旦成事,港人不但要交重稅,身扛極大負擔,令國家破產,債遺下代;亦令社會懶人處處,跟「綜援養懶人」一樣,社會將倒退至共產黨大鑊飯時期,有違港人勤奮上進的精神,「每個人嘅幸福都係要自己安排自己!我𠵱家已經儲緊錢,希望我自己養老嘅,如果我有仔女都唔係靠仔女,除非我搞唔掂,先睇下政府有無資助,咁先得㗎嘛!」說着,盡是個人能支配生活、自食其力的心態。然而福利真是養懶人?筆者記得陳淨心說過,「我哋嘅父母、上一代幫我哋建設咗咁美好嘅香港」,聽此言自感其惜恩之情;全民退保,實是報答上一代貢獻社會而生的設想,也是世界各國面對人口老化而實施的制度。香港政府兩萬億的財政儲備,絕對有條件為長者制訂更合適的養老制度,關鍵是如何把錢用得其所。

比筆者年長的愛港力成員常道﹕「你哋年輕人有理想係啱,但現實就係現實。」陳淨心特別叮囑筆者要把全民退保的錄音抽出來認真多聽多思考。他們的現實是什麼?是社會要平息爭拗重回正軌,背靠祖國發展經濟,港人才能安樂進步。由是談到自由行,陳淨心說﹕「香港係無資源,地底係無石油嘅。𠵱家香港係靠自由行、靠遊客嚟推高香港人嘅就業率。你話cut咗自由行,你知唔知香港有幾多人失業呀?」但自由行推高租金令老店小舖結業,本土文化消弭,又是好事?「咩係老店?」陳淨心問筆者,筆者有點驚詫她對「老店」這標誌性用語的陌生,「(即係好耐歷史嘅舖頭……)你覺得個社會係唔應該進步㗎?社會係要進步㗎,你下下都話要保育……你要明白一樣嘢,社會係要向前㗎,而唔係緬懷過去。當然你可以適量咁懷舊,但社會要發展,發展先能令人進步。」然而發展只等於經濟或GDP增長?對歷史的尊重何嘗不是?保育也是嘗試把一些無價資產留給下一代。記得陳淨心談着鄉下澄海時展露的安慰淺笑,筆者亦希望下一代能擁有這種尋根的喜悅。

不該「大香港主義」 愛國就要寬容

愛港力經常被認為是紅色團體,但他們對香港、中國和中港關係的論調,又真是那麼驚為天人而陌生嗎?「我覺得有部分香港人呢,係有一種大香港主義嘅心態……我阿爺係六十年前係潮州嚟香港落地生根,其實香港有絕大部人嘅上一代都係響國內落嚟,根本上我哋同國內係同根㗎。如果係想國家好,應該係用我哋好嘅思維教育下國內……可能有啲人嘅文化未到,但你要諗,三十年經濟改革開放,由窮到褲穿窿,到今日成為國際經濟第二大強國,呢個係奇蹟!」

陳淨心說來盡是對國家的理解與包容,「硬件你可以咁強大,但軟件,好似係人民質素,未追得到,但我哋唔可以歧視國內人囉。香港地方細,有香港人文化,國內我哋唔了解,但我哋應該去包容並肩,就唔係話人哋係蝗蟲、支那,咁即係話番自己!」愛港力成員對國家和政權的好感與寬容,遠遠超過對本地政客與媒體的認同。談到最近中一億賑災之事,亦可見其憂國憂民,比主張監督政府施政、警惕政府濫權腐敗的筆者,顯得更有「善念」﹕

陳﹕捐一億有咩問題呀?國家有難呀!捐一億已經係少啦!

離﹕有貪官喎!

成員Oscar﹕係唔係證實到先?

離﹕有啲記者話其實有呢啲事……

陳﹕有啲記者!(質疑語氣)有時唔好雞蛋裏挑骨頭囉,做人要有包容心囉!如果你心諗有貪官,咁你嘅心已經醜陋啦!……你嗰度個五區公投都無問過我答唔答應啦,使咗一億七千萬呀!嗰啲唔係我哋血汗錢呀?

後記﹕「反係一定有理據畀佢反」

兩個多小時的訪談,民生國族議題拋了一堆,在筆者看來都與政治息息相關,然而陳淨心卻明言,「我哋唔係好鍾意香港變成一個政治社會,即係樣樣嘢都要政治化。其實我哋係好着重對香港人一啲長遠嘅民生發展,呢個係關乎我哋下一代嘅福祉。」民生和政治真能分開而論?「我自己感覺政治係咩呢?就係要令到社會分化、爭拗、矛盾,呢啲就係政治遊戲。樣樣都要政治化,社會咪會有好多對立面、好多爭拗?呢樣對社會無好處。」在他們看來,民主派只懂吵鬧,毫無建樹,「反係一定有個理據畀佢反,當你有反嘅意見之餘,有無好嘅理據呢?從來都無」。

質疑民選 以福利換選票

愛港力成員對所謂西方的民主制度充滿質疑,認為民主選舉是「以福利換選票」,令國家欠債纍纍的「金錢遊戲」,「你唔可以要中國一夜之間有民主,民主係要循序漸進、按部就班咁去行我哋中國人應該行嘅路」。相比起西方民主國家美國四處征戰,中國顯得很和平,「我哋中國人唔會挑起戰爭,唔會搶人哋嘅嘢,我哋永遠都係有合作、商機」。筆者提到非洲,想以此引出「合作商機」其實是外交手段,中國亦榨取了當地大量的天然資源,但論點還未開展,已被其餘兩位成員洞悉心意,兩人唱雙簧般向筆者拋出兼具實際例子的論述,說服筆者中國如何與非洲國家創造經濟雙贏,令勢孤力弱的筆者難以招架。問他們是否整天聚談時政?他們就笑着稱是,談笑間,盡顯相知相惜的默契。

人人有工 安居樂業 咁就夠?

相對而坐的我們,各自勾勒着對這個地方的想像和寄盼,都渴望「香港好」,陳淨心特別關注下一代,「細蚊仔係要好好咁讀好啲書,將來出嚟搵份嘢做,了解呢個現實嘅社會係點樣。當然細蚊仔係好有理想,有理想希望個社會好,我知道,但唔係瞓馬路去抗爭就可以要脅到政府、社會,要脅到國家!」她說,自由必要有自律性,違法就要被制裁,「只要香港保持繁榮穩定,人人有工做,安居樂業,個個都有自律性,奉公守法,自由來了,民主就會自然來」。筆者當下想回她一句「理想是理想,現實是現實」,卻怕惹她生氣而按捺住了。

問她,有孩子嗎?「無,因為我自己無細蚊仔,我會當咗所有香港人嘅下一代係我嘅細蚊仔,我希望佢哋有好嘅將來,讀好啲書,將來出嚟會搵一份好工,有家庭,生兒育女,社會安定繁榮,安居樂業就會好」。筆者聽着一陣觸動,因為一種原初的真純。我們腦中的香港圖像,南轅北轍;看到美滿的一方要維持現狀,正視困頓的一方要抗爭改變。陳淨心常說,香港社會很多怨氣、負能量,她希望為港人帶來正能量;然而筆者想到,若不先傾聽他人的困苦,何來明白苦痛的源頭?正如她說,「不是拎支港英旗去揈揈吓就可以解決問題」,她所謂的負面怨氣、深層次矛盾,難道又是揮揮紅旗、喊喊口號便能解決嗎?

問﹕阿離

80後,在香港土生土長,接受小、中、大學教育,也是普通市民。近來開始與母親談論時事,目標是令她不再討厭長毛

答﹕陳淨心

愛護香港力量召集人,自稱「潮州辣妹」,經常以「普通市民」自居。於2011年在網上組織愛港力,自此以「愛國愛港」為口號,經常在各大論壇、清談節自、公開活動中以言以行挑戰民主派人士,其出位行徑被形容為粗野激進非理性,但仍無改其我行我素形象,口頭禪是:「人不犯我,我不犯人;人若犯我,我必奉還!」不看《信報》、《明報》、《蘋果日報》,認為《文匯報》可信但嫌多字,只看另一份主流大報。

文 阿離

圖 李紹昌

編輯 蔡曉彤

fb﹕www.facebook.com/SundayMingpao



原文連結