2013-12-09

【輔仁媒體】婷欣:望住D中學雞,我覺得佢地好柒,但係又好羨慕 (2220)

是咁的,上個禮拜我自己一條毒J去左譚仔食lunch,同檯坐左六七件中學雞。

佢地岩岩上午考完試,放左成班友仔一齊去醫肚。期間佢地不斷大聲講大聲笑,搞埋晒D無人知個笑點係邊既爛gag,食食下撞到學校老師成班發晒癲咁叫:「Miss BB豬」,成間譚仔既客都啤撚住佢地。坐係我對面既大概係一個自命魅力四射既死o靚仔,我見到佢不斷抽隔黎位女同學水,借D以搭人膊頭又挨身挨世。果位女同學向佢D friend打眼色,細細聲講:「嗚,好慘呀」,但係個樣明明就暗爽緊,扮晒吊高黎賣。

(偽文青mode)講真果句,有少少柒到唔敢睇,但我又好撚羨慕,原來自己以前都係咁撚柒。

 

以前讀中學成班友仔on99,係課室入面幾無聊既野都做得出,我最中意就係剪報紙做手工,大作如下:

李嘉誠

 

想當年好傻好天真,返學就係喪玩,無無聊聊咁又一日,就算講是非都係講埋晒D on9野:「男班長同某某女同學有路、小明係咪暗戀Miss Lee、PE呀Sir同班主任係咪拍緊拖」,講完都係大家開心笑下,You know what I mean.

升到大學,唔係話識唔到老死,但硬係覺得有D野唔同左。以前係班房入面成班人嘈嘈閉,而家呢?如果你係讀大系,每次上lecture個課室閒閒地都成百人,欠少少主動真係除左同你做project個group mate之外就乜人都唔識,一條毒J縮埋一二角默默地上堂,上完成個sem都唔認得邊個打邊個。

如果你住hall、上莊、或者好sociable都話好少少,唔係既話,就算你識左一大班人,往往都只係叫得出佢個名,Say句Hi,講句Bye,and nothing more.

開始返下Office Part Time,更加體會到咩叫貌合神離,幾個同事好似好Friend咁,日日夾埋一堆食飯,但食飯時永遠都係講埋晒D無關痛癢既野,一係就成日搵唔到話題而dead晒air。

唉,年少多好,唔好唔記得你舊時班老死。

 

後記:

小妹無寫野咁耐,點解突然有衝動搵返寫作既習慣呢?我要多謝一個人,佢叫史兄。(植入式廣告)佢本新書真係好好睇,快D去買啦,哈哈。

 

史兄給林婷欣

 



原文連結