2013-12-29

【輔仁媒體】翼雙飛:請不要再逼男人陪你shopping 了 (877)

來源:http://instagram.com/miserable_men

來源:http://instagram.com/miserable_men

 

每次我行街,見到成棚男人喺店舖外面等女友/老婆,眼神空洞,喃喃自語好似鬼上身咁,我就替佢哋覺得慘。唔知佢哋等咗幾多個鐘,所以陷入半崩潰狀態?但係有啲女人唔知點解總係有舖咁嘅癮,鍾意帶埋個男人去shopping。經過我上各大女性討論區爬文,明查暗訪女性朋友,總算得出幾個原因,但我點睇,都覺得呢啲所謂原因都係站唔住腳嘅。

 

「我揀衫想男朋友幫吓眼。」

小姐,老老實實,喺男人眼中,女人衫只有多布同少布嘅分別。你問佢黑色定藍色好?晒氣啦。佢根本就唔會分到有咩唔同。分分鐘你一星期七日著同一件衫去見佢,佢都唔會發現。就連內衣褲,佢哋都唔care,只係想快啲除咗佢。

女人著衫呢,係著俾女人睇嘅。只有女人先會留意到你買咗新衫,件衫係日系定韓系,今期Vivi有登過呢個款,隻顏色襯唔襯你膚色。所以你買衫要意見,只有女性朋友先會俾到你。

 

「我想男朋友廿四小時喺我身邊,連shopping都係。」

如果有女人覺得將男人廿四小時困喺身邊就係好,我覺得佢實在太天真。我一向都唔鼓勵啲人一拍拖就放棄晒所有私人時間,就算你嘅私人時間係匿埋喺屋企煲韓劇都好,你都一樣要有唔同伴侶一齊嘅時間。

原理好簡單,就係不論男女,人天生就係犯賤嘅。有時有、有時無,你先會掛住果樣嘢。譬如你好鍾意食雪糕,每個星期食一杯,正。我叫你雪糕當正餐,三餐只准食雪糕,不出一星期你就作嘔啦。

 

來源:http://instagram.com/miserable_men

來源:http://instagram.com/miserable_men

 

「我想有人幫我拎嘢。」

我詢問幾位男性朋友:「如果你女友叫你陪佢行街,因為要你幫佢拎嘢,你會點諗?」

「我會欣賞佢嘅誠實同直接,但我都係唔想去。」
「咁佢會話你唔錫佢。」
「最多約定幾點佢行完,我去接佢返屋企囉。」
「佢話唔得,要你由頭跟到尾拎嘢。」
「點解呀?」
「佢話重喎。」
「佢有幾多嘢要買呀?買座山返去好唔好?」
「女人行街之前點會預計到要買幾多嘢?你認真答我啦。」
「開頭幾次都會應酬下嘅,但之後真係唔願意。唔係唔錫佢,但真係好強人所難。就好似半夜三更女友打電話嚟,一次半次都話,成日都係咁,真係消磨緊個男人對佢嘅耐性。」
嗱我幫手問咗啦,女士們你哋自己諗諗佢啦。

 

「我想有人幫我俾錢。」

如果你對呢位男士係認真,絕對唔好俾佢睇到你狂買然後要佢俾錢。間唔時扭下男朋友買啲嘢俾自己無問題,係情趣嚟。但係如果你有收入,依然樣樣嘢都要佢俾錢,買自己衫自己鞋自己護膚品都要用佢錢,佢會質疑你係愛佢啲錢定愛佢個人。如果你想同呢個男人做人世,我就覺得搏唔過囉。

 

所以各位女士,shopping呢家嘢真係女性專屬興趣,對男人嚟講等於酷刑。講到拍拖要開開心心,無非都係將心比己,互相尊重。俾著你男人要你陪佢去黃金買底板,行勻成個腦場格價,仲要問你:「你覺得華擎 Fatal1ty H87 Performance好定係技嘉G1.sniper B85好?」你都會覺得係一種折磨啦,係咪?

 

來源:http://instagram.com/miserable_men

來源:http://instagram.com/miserable_men

 



原文連結