2014-02-24

【主場新聞】添馬男:走硬數 (837)


雙辣招法案,張炳良用口頭承諾加辣時先交立法會審議:拒絕將有關安排寫入法例,引起泛民議員集體離埸抗議,反對政府帶頭破壞法治,呼籲張炳良日後唔好走數不認帳。泛民究竟太真定傻,梁班子走硬數。

前年上場新政府擺出一副港人優先姿態,抽水討好本土派,當時北京仍未覺察到梁抽水行徑,大大助長本土派行動,但政務官已認為「港人港地」有問題,梁及其房屋政策顧問睬佢地都有味;堅持上馬,在相關條款未準備好,便高調推出港人港地拍賣。但唔知點解,最近半年有關政策消聲匿跡,完全提都唔提,賣地表內也冇咗港人港地,大家驚唔驚?

另一單係人都知嘅走數行為,就係強積金對沖長服金,本來講到似層層今年上馬,勞工界在施政報告前收到風,於是立即做嘢,在傳媒層面炒熱佢,夾定計扮成功爭取。點不知在毫無預告下,最後施政報告中隻字唔提,工聯會都被梁耍了。又一宗人所共知走數事件。

至於堆填區擴建及新建焚化爐,就係一宗撼頭埋牆式走數事件。本來上屆政府千辛萬苦過哂骨,準備埋尾之際,遇上特首選舉,梁振英為討好一班政治上白痴兼幼稚之環保佬,扮哂有型話無需要擴建及興建新焚化爐,天馬行空地吹牛,認為只要大家齊心,源頭減廢就得,水抽完後,上屆政府焚化爐計劃得唔到立法會支持,唯有擱置。梁贏得民望,赢埋特首個位,當日稍為對政府政策有認識之人,都知道源頭減廢尤如「阿媽係女人」,永遠正確,但遠水救不了近火,日後一定會走數,自打咀巴。果然,今日黃錦星為乞票,表示擴建堆填區及興建新焚化爐刻不容緩,真係現眼報。

至於預告任內一定會走數者,除資助房屋建屋指標外,忡有全民退保、標準工時,一定搞唔掂。呢類利益分化對立嚴重之大政策,強如第一任奧巴馬,挾強大民意支持上台,也只能夠做好一瓣公共醫療改革,仲要在上半任開波。梁改革香港大計多過奧巴馬,但上半任冇大政策做過,一味拖、做硏究,自己民望已跌至「表現失敗與拙劣之間」,根本欠缺足夠政治能量處理有爭議政策,唯一只有狂派福利、但愈派邊際效用愈低,今年勁派二百億經常開支,民望升幾點,維持幾個禮拜立即打回原型。

梁振英政府,已注定係一個走數賴帳政府,人不要面,天下無敵,香港市民可以奈佢乜嘢何!一個連北京中央都敢走數嘅人,又點會放香港人在眼內。

蘋果日報連結



原文連結