2014-03-29

【主場新聞】Lucina Lo:每個男跑手都想身邊有個徐濠瑩 (2509)


(編按:圖來自徐濠縈 Facebook ,作者徵得徐濠縈同意,於本文使用相片。)

很多人不喜歡徐濠瑩,早前更無端把她跟謝安琪比,不過我敢講一句,大部分男跑手都會揀徐濠縈。

各位男跑手的另一半,現在告訴你們,每次跑步,最重要的環節係跑完後的活動,因為跑步時出盡奶力,莫講話講嘢,就連氣都吸唔切,所以每次跑到周身酸軟,雙腿發痺雙眼凹陷之後, 最想就係跟剛才一起跑步的伙伴坐在一起,把酒當歌一蛊兩件又好、狂吞兩個豬扒飯又好, 邊吃過痛快邊講番頭先練跑練山時喺邊度 PK , 喺邊度作抽筋,喺邊度過咗邊個同邊個,幾時想跌 WATT 邊度見到個靚女之類之類⋯⋯要完成這餐飯才叫為一課練習或一場比賽劃上完美句號,因為事後分享絶對是一場練習和比賽的重點。

多次見過男跑手的失望表情,不是他們這場練習跑得唔好,而是每次跑後收到的奪命追魂 call ,例子包括:

  1. 練習後食食吓飯,友人收到電話,佢一聽,跟住答:「依家行緊去部車度準備開門!」收線後當然大家都唔敢 comment 只係若無其事繼續吃飯,還記得當時我哋餐飯, 其實只吃了一半。
  2. 明明約好練習後一起去邊度邊度食什麼,練習後,友人打電話諗住約老婆出嚟, 點知,老婆一句話:「我都係唔想出嚟,你返嚟啦!」(呢句係憑友人面上的表情估的),就係咁, 連嘢都未食涼都未沖,友人就咁就揸車返咗屋企喇!仲要等咗幾個鐘先同老婆出街開飯。

回到家中,未能跟唔跑步的另一半分享跑步感受已經不是味兒,精力亦同時處於低位,跑爆咗更加係食唔落飯而只想瞓覺,但這個時侯,另一半就係剛剛精神奕奕咁起身化完個靚妝準備出街 shopping 睇戲食飯,男跑友只有無奈地跟住另一半出街,睇戲都還好,起碼可以瞓吓覺釣吓魚,要行街就係真係攞命,你知道跑完步、 比完賽雙腳係幾咁攰,「屎忽筋 (hamstring) 」又勁痛之際,仲要喺人來人往嘅商場慢行,真係陰公豬!

各位唔跑步的女士,其實很多男跑手都在跑步取得很大的樂趣和成就感,而每次練習,他告訴你跑兩個鐘,其實全套練習絶對唔係兩個鐘,因為當中仲包括事前的拉筋 warm up ,跑步後的拉筋 cool down 和吹水,還有跑完一課長課後,瞓個晏覺才是練習的亮點。

既然你俾得老公出去跑步兩個鐘,不妨再寬鬆一點畀多一個鐘,起碼可以沖完個涼同跑友吃個飯吹吓水,甚至你都要食飯的話,不妨踏出一步,跟他一起跟跑友們吃飯,比起你的追魂 call 來得令另一半心安,亦多一份尊重。因為敢告訴你,要面子的男士在朋友面前最不喜歡收到另一半的追魂 call ,被朋友知道怕老婆是多麼沒面子的事。

還記得有次朋友陪我比賽,我還冷好心咁跟他說, 你下午先來陪我跑, 不用咁早出來吖,佢即刻成個彈起, 然後答:「唔好⋯⋯我向老婆攞咗一日 permit 㗎喇!」 佢講起已申請了一個全日 permit 時,眼中仲閃光。

又想起曾跟一個男跑友傾開, 我話你不如把你辛苦練習嬴回來的獎牌送給另一半, 係一件好 sweet 嘅事,可惜他答:「佢只會覺得呢個獎盃係垃圾!」

所以話呢!我相信每個男跑手心中都希望有個徐濠瑩,即使步速唔同,心境一致,跟她分享也明白你感受。



原文連結