2014-03-12

【輔仁媒體】羅安尼:王維基走投無路 (3810)

尋晚食飯時間,無線播《愛回家》。一年睇冇幾次《愛回家》,令我發現原來夜晚八點都有教育電視睇,用好低 B 嘅劇情宣傳器官捐贈,穿插「網上好多資訊都唔正確」嘅對話,臨尾仲要加插政府宣傳焚化爐嘅訊息,睇到人智商倒退咁滯。嗰下我發自內心咁話:「真係寄望香港電視快啲開台。」

屌,點知真係烏鴉口。

今日香港電視股票停牌,我最初天真諗住宣布開台細節,點知啱啱相反,係宣布延遲開台。咁當然啦,同一日有馬來西亞航空失蹤事件嘅延續,以及因為澄清免費電視牌照顧問報告而畀人炒魷嘅伍珮瑩出嚟控訴有人迫害佢,維基開台無期,到底得到幾多人關注,又成為一個謎。

或者一男子嘅影響力真係無遠弗介,或者佢真係有仇必報,王維基畀佢玩到走投無路,連帶全港唔想睇維穩劇同重播台嘅觀眾一齊受罰。原本諗住流動電視係殺出新血路,原本諗住中移動以前冇受規管家下自然過到骨,原本諗住無線唔租發射站仲可以打遊擊……一切原本諗住、一切創新嘅諗法,都喺政府嘅黑手之下化為烏有。

嗰邊《神抄之塔》被高價收購,呢邊香港電視被趕盡殺絕。我真心質疑,到底香港仲係咪一個賞善罰惡、優勝劣敗嘅地方?

《愛回家》添食添食再添食,從處境劇到倫理劇到維穩劇,差在幾時變樣版戲。《警界線》押後押後再押後,從免費電視到流動電視到淨返本大利少嘅網上電視,捱唔捱得到大氣電波頻譜重新洗牌都成疑問。萬一到時揭盅,又係「仆你個街,亞視嚟嘅?」我都唔知仲可以畀咩反應。

時為鹿年農曆二月,一眾牛鬼蛇神經已急不及待蜂擁而出,用大家聲援李慧玲嘅口號,反對「亞視被滅聲」、「捍衛亞視言論自由」、「我要有權睇亞視」。以子之矛,擊子之盾,新聞從業員緊守崗位、健筆們繼續爬格仔、大家聚埋喺政總 5-minute stand,到底仲有乜撚嘢用?

有形之手以經濟手段(錢)收買支持嘅聲音 ,用「馬英一」至「馬英八」嘅簽名支持喺茶果嶺起酒店,呢啲傳統和理非非嘅抗爭手段已經畀對家用嚟維穩,市民無論係港人、港豬定港喱都已經麻木,到底大家仲要白行軒尼詩道幾多趟?



原文連結