2014-04-15

【輔仁媒體】大埔陳奕迅:九巴係唔係都唔妥大埔居民? (1201)

大埔陳奕迅攝

大埔陳奕迅攝

見隔離評沙田嘅重組方案屌得咁過癮,忍唔住都想抒發一下悶氣,抒發一下作為一個野生大埔仔,見到呢份期待已久嘅重組路線方案係幾咁失望。

是咁的,話說眾所X知九巴區區都搞埋啲咩重組方案,拿開初我哋不如睇睇九巴同運輸署係點講重組目的嘅。

◆增加更多點對點的特快路線服務
◆拉直迂迴路線,方便乘客更直接到達目的地
◆參照屯門公路轉車站的模式,善用現有位於主要幹線收費廣場的巴士轉車站,以及於各區的巴士總站及主要巴士車站設立大型轉車站,並改善其配套及提供更多轉乘優惠,為乘客提供更多路線選擇
◆整合、減少甚至取消使用量嚴重偏低的巴士路線、有替代交通工具而又與其他路線重疊的巴士路線,而所騰出的資源可投放到新開辦或需求高的路線

大埔陳奕迅攝

大埔陳奕迅攝

聽落好似唔錯咁。姐係如果成件事係cut左啲廢線呀載空氣線呀去開啲多人坐嘅路線,係何等嘅皆大歡喜呢。不過自從北區重組令區內居民怨聲載道,換嚟一架比取消左嘅東九龍線70X更載空氣嘅過海373A線之後,大家似乎對所謂嘅區域重組都多左份戒心。結果隨後嘅元朗,葵青,以自近日輔仁熱傳嘅沙田都聽聞bam左九巴嘅果堆只cut線cut車毫無改進嘅方案。雖然都叫做巴膠,以我對葵青區嘅少少認識,夠膽講葵青果份絕對稱得上為災難級。不過今日講嘅係大埔吖嘛,葵青果份自己睇啦。

講返大埔,究竟九巴想係大埔搞啲乜?

區內線重組:71K

作為區內名勝嘅71K,相傳兩邊總站太和同大埔墟站呢,人類爬行嘅話好似話係會快過呢部71K嘅。當然呢部71K唔係真係俾你游車河(事實係好多無聊人,包括我自己,會坐足全程,個人認為無坐過全程71K無資格叫自己做大埔人囉。),主要用途就係俾各條屋邨,尤其富亨同富善啲公公婆婆坐去新街市(大埔墟綜合大樓)買餸,以及係作為區內那打素醫院嘅接駁嘅。除此以外,作為大埔孤島嘅富亨邨(稍後將會另文詳述此孤島)有好多乘客都用佢嚟接駁其他區外線,雖然通常都會等到變化石。

話說九巴就想拆開兩條分別叫71C同71D嘅區內線去代替佢:

71D

71C

圖片來源:區議會文件

大概係將原有路線拆做東西一條,南北一條,將唯一穿梭區內嘅71K就咁拆開左。但係就引發左以下問題:

富善邨失去直接來往新街市路線

雖然唔係住富善,但係富善的確有唔少人會搭71K,以學生客同買餸客。計劃如果實行的話富善街坊將不能一程車去到大埔墟,而要先坐71C去富亨,然後再轉乘71D。講真,邊個會咁做?講緊行條回頭路做所謂轉乘,最大問題係兩條線班次都做15分鐘,一個唔好彩兩邊等車都無左半個鐘,邊個會同你九巴癲?

區內網絡破碎

好多組合,包括廣福來往太和,富善來往運頭塘,都會無左直接嘅路線。啲公公婆婆想話去下社區中心,又或者係約下人去其它屋邨飲茶呀打麻雀呀,難上加難。

富亨街坊難以轉乘

拿大埔就眾所周知,富亨係最偏僻最交通唔方便嘅(總之稍後將會另文詳述此孤島)。咁正路計富亨街坊點都應該會有架接駁車,類似北區車海式嘅273A做接駁。只不過事實係咁多年大家都係靠無轉乘優惠嘅71B,以及等到下年都未有車仲要兜勁耐嘅71K做接駁。

而係呢個方案入面,估佢應該係目標用71D嚟運載富亨街坊出廣福搭車。但仆街就仆街在,第一,班次無改善,依然係十五分鐘一班,依然等到變化石。

最大問題係,呢個作為富亨人真係唔撚講粗口都唔撚得,屌你老母連富亨巴士站都唔撚入你想點撚樣呀?

fh

拿咪撚話我屈鳩佢,放大嚟睇,佢就係富亨對出一段頌雅路飛過,完。富亨街坊要坐車,就要係橙色呢兩點嘅位置上車。問題係入啲果幾座真係要行到無雷公咁遠先坐倒車囉。唔好睇少入唔入巴士站呢段距離,講緊絕對係有五分鐘嘅步行距離。如果富亨好似其它邨有幾條巴士線揀都話姐,偏偏對外線得一條,大部份時間都必須轉乘,呢個設計我真係諗你唔撚明囉九巴。

兩條線設計都用單層巴士,姐係其實用單層巴士就唔係問題嚟嘅,如果你班次做到最少十分鐘一班嘅話。

九龍西路線

另一個主要變動就係72X線改行青沙公路。為左測試今日特登日間搭左程72X出旺角,廣福邨出發半個鐘唔洗已經到旺角鐵路站嘅巴士站。改行青沙唔係問題,但計劃中九巴竟然想將佢兜大角咀,以及改為類似循環線運作。WTF。

第一,計劃中無視現時旺角道嚴重塞車嘅問題,仲繼續塞入去兼將果度改成主要上落客站。需知道旺角道塞車係比彌敦道更嚴重,佢設計上仲話要俾司機有需要時駛上旺角東站休息,我夠膽講係旺角道經洗衣街果邊要揸上旺角東站,再揸落嚟去返旺角道上客,即使唔停車呢度來回講緊一定會用左二十分鐘。咁改嘅用意到底係乜,我真係完全唔明。仲有,兜大角咀一段路,燈位又多而且塞車問題又係嚴重嘅,玩下手由落公路去到旺角道唔見左半個鐘,夠原線由廣福出嚟。姐係如果你要浪費時間嘅,我寧願你行荔枝角道果邊過黎,仲可以順手做埋麗閣,深水埗,太子一帶,以及旺角段嘅彌敦道,保證大埔居民拍手叫好。

只不過大埔就有一條半滄海遺珠嘅路線,72,來往長沙灣至太和,作為毒撚兼最鍾意出深水埗hea嘅小弟經常乘搭,貪佢一程車去到黃金高登一帶,食返個豆花米線同囍囍雞髀真係人生一大快事(深水埗毒撚美食第時再講)。只不過路線係大埔人眼中比較迂迴,嚴格嚟講全程不經高速公路,先經中大一段嘅大埔公路,後落瀝源沙中(回程更會經大圍美林),再行馬騮山一段大埔道落深水埗。作為常客嚟講,可以評論一下72呢條線,

首先,越嚟越多人搭係事實。平日72非繁忙時段都大約可以坐滿窗口位,假日來回方向更多數坐滿,而繁忙時段每日返工時間返大埔,深水埗尾站九江街更加係登車困難,經常頂閘入大埔。之不過班次依然無大改進,維持15-25分鐘嘅水平。

但今次重組入面,72並無改路,只係將九龍總站延長至美孚。作為常客,72行大埔公路大埔段會比吐露港慢少少,但問題不大,而沙田段大埔道其實係幾快,如果講黃金高登果邊的話可以講絕對比行青沙快。真正問題在於沙田區一段。回程於沙田區由美林邨至新城市至禾輋邨一段起碼行十六七分鐘,相對直接行公路其實慢唔少,如果唔行沙田一段其實72線由大埔出深水埗應該大約半個鐘可以完成。然而九巴似乎忘記區域性重組其中一個主要目標-拉直迂迴路線,方便乘客更快到達目的地,但服務大埔至深水埗嘅72竟然繼續反其道而行之,繼續兜沙田。大佬,咁做嘅話條線梗係唔夠人搭啦。正正常常來往大埔至深水埗嘅話,點會唔夠客?72沙田段來往深水埗,太子一帶有更平嘅81,86,大埔來往沙田亦有72A,73A,諗唔明點解仲要大埔出西九龍嘅車兜落沙田,浪費大埔人時間俾沙田叫兩飛囉。

九龍東及大埔公路路線

計劃中相信最大爭議係74A線嘅取消,同埋將來往大埔至大圍嘅72A大幅縮減班次,離譜到開一個鐘一班。大埔公路嘅居民今次真係想唔同佢反枱都難,七年前取消去佐敦嘅70,北區重組就縮73A,而家取消埋去九龍東嘅74A都算,仲要將接駁車72A都cut到幾乎半取消咁制,癡撚線。

74A要取消唔係問題,但係74A同72A加埋cut走左十三部車,到底去左邊度?九巴陰陰濕濕咁,乜嘢補償都唔做就想cut資源慳錢,荒天下之大謬。74A嘅取消將會令運頭塘邨,太和邨失去出九龍東嘅巴士,運頭塘更係唯一一條出市區嘅車。連帶沙田同大埔亦會少左架入九龍灣工業區嘅直車。為表誠意,九巴會開特別車收工時間九龍灣工業區返大埔,三班咁大把。以表補償,九巴仲計劃將307非繁忙時間延長至太和,不過廢話,當然啦車就唔會加,以後大埔中心巴士站嘅乘客,包括富善富亨嘅街坊以後預時間搭307成為絕響。

而線王74X嘅乘客,唔好意思,大家引頸以待嘅飛彩虹鑽石山九巴將會繼續扮乜都睇唔到,扮無發生過,係咁二收工時間開兩班車(仲要係原有資源)塞住你把口,大家繼續日日收工頂閘焗兜浪費時間直到永遠。應該更好地運用嘅75X不作任何改動,當然啦今時今日嘅九巴唔改好過改就係真嘅。

其它

64K特別線嘅改動嚴格嚟講影響唔算大,不予置評,過海線307改動已經講左,值得一提嘅係九巴計劃將早晨特別線307A,B,以及新增嘅C改行青沙西隧。令人擔心嘅係,朝早新城市外一段高速公路日日都塞到仆街,怕且即使307ABC同將來嘅272X,只會陪塞埋一份。講到呢度我真係唔明,究竟九巴係咪將青沙神化得太過分?乜柒都話要改行青沙?

未只呀,連朝早得一千零一班由富亨經深水埗出長沙灣嘅272P都要改行青沙,最on9嘅係仲要改行科學園,都唔知為乜鳩?大埔人有幾多個會特登比出九龍價錢特登等你呢一千零一班車同你係科學園落車?都算,條路線竟然騎呢地改總站去葵興,由青沙,落長沙灣,經美孚,去葵興。聽都覺得on9啦。

又試想像,邊個會同你特登等呢一千零一班車,放棄方便快捷嘅73X城隧轉車,而同你兜科學園,長沙灣,美孚,去葵興?定只不過要為左所謂“完成轉車站網絡”而搞場咁嘅大龍鳳?相信答案都呼之欲出啦。最慘係搭呢班車去深水埗返工嘅街坊,成半車人做炮灰犧牲左,要同你係經已被九巴神化嘅青沙轉車站轉286X。

嚴格嚟講,大埔弊病同沙田都差不多:應改的不去改,不應改的卻改得亂七八糟。居民真正訴求無人理過,呢堆講到真係口都臭。

271班次不穩問題

271來往尖沙咀,佐敦,油麻地至富亨,係區內其中一條最重要嘅路線。然而九龍區總站廣東道無站長管理兼塞車嚴重,導致班次極度不穩定,一係嚟一抽車,一係等一個鐘,無人理。

307P班次不足

大埔唔似隔離沙田可以有條全日嘅682去港島東,但繁忙時段嘅307P就早晚爆廠,供不應求。而且太古城,西灣河一段,依然係對外空缺,有需求無供應,無人理。

大埔來往新界西路線

北區坐擁76K,77K,276,276A,276B,276P六條來往新界西嘅路線,然而大埔今時今日都只得一條坐到2046都未到元朗,兜山路嘅64K。全車成百人去元朗果啲日日焗兜,究竟浪費左幾多時間?路況所限,64K只行到細車,客就多多,已經無鐵路競爭,九巴照樣唔理。爭取多年,毫無成果,無人理。

對外路線區內走線過分集中,迂迴

route

睇呢幅大埔市區圖就會明白。全大埔嘅對外路線基本上由大埔中心起都採用黑色呢條走線出吐露港(75X行走寶湖道),而富亨邨,富善邨,太和邨,運頭塘邨則完全被忽略。太和,運頭塘姑且與港鐵站為鄰,富善則有免費接駁港鐵巴士K17,以及都有73X,75X,271,網絡都可以接受。但區內嘅富亨邨,交通網絡相對區內其他區域則是完全過分地不平衡。

富亨開邨至今,只有271一條全日對外線。然而271區內走線迂迴,由富亨開車去到廣福上公路足足用左二十分鐘,以富善一段最浪費時間。接駁線配套亦差,富亨係全大埔唯一一小區無免費鐵路接駁巴士(俗稱K巴)來往大埔墟站,富亨街坊日日來回比成八蚊搭班次不足,而且停站多多嘅71A去港鐵站,哀哉。而71K,以致將來71C,71D嘅問題上面講過,不再詳述,綜合而言難怪富亨被區內人稱之為“大埔天水圍”。

個人覺得,住富亨慘撚過住天水圍。(利申:真係住富亨)

作為真大埔街坊的建議

拿,我夠膽講,以下落嚟嘅建議我唔夠膽講係最好,但相信好過九巴方案。

區內線,71C同71D唔係唔得。但既然cut左成十三部車,真係唔可以加落區內線強化接駁?十分鐘一班,最低要求。你要人轉,你都做密少少,好嗎?

不過咁,轉乘不是萬能,建議大執以下路線,九龍東及九龍西分兩組進行。

第一組:74X,75X

既然要cut 74A,既然要轉乘,請俾多個選擇街坊,唔該。74X可保持現有區內走線,唯改行寶湖道代替廣福道。
而75X,則改成區內其他區域嘅九龍東線,走線如下

1836694_10152291019234570_1924928136_o

九龍段走線不變,唯區內改為太和作總站,服務太和邨,舊墟,大中部份,富善及富亨街坊。來回走線儘量以行大路為主,應該可以比271由富亨至廣福走線快。

凈係去到九龍城?互轉吧,74X/75X大老山互轉。

1522728_10152291019254570_1901969842_o

第二組:72/72X(272X)

人類已經阻擋唔到九巴將路線改行青沙嘅決心。既然係咁,就一於擺埋72上青沙。72跟上圖走線,改行吐露港公路,青沙公路,後跟286X由海麗,西九龍中心,長沙灣至美孚。青沙轉車站網絡唔洗多講,之後點轉都得。272X繼續跟72X現時區內走線,但可考慮改行荔枝角道至旺角。

其餘嘅,首先72A唔該唔好cut車,相反以取消74A嘅資源加兩部俾大埔公路一帶居民做轉乘,轉做主力接駁,咁居民就算無左部直車,有部頻密嘅轉乘都叫執返隻吉,而唔會係取消九龍直車再陰乾接駁車咁弱智囉。而大埔走線則可改跟74A現時大埔走線至海寶花園一帶,轉入大埔中心後直至工業邨,沙田則改經源禾路一帶及改經沙中以覆蓋原有72線撤出沙田漏洞。如此一來,運頭塘街坊繼續有車搭,大埔工業邨以及大埔公路一帶亦有更完善接駁。

而服務荃灣一帶嘅73X可以無需改線,但早晨線273C/273P則可考慮將其中一條改跟74C,擴大服務範圍覆蓋富亨,大元邨,新興花園,而無需兩條路線重疊走線,造成資源重疊。

如此一來,大埔各小區都可有來往九龍東,西的路線,接駁亦更完善,74A的取消亦可令九巴出少幾部車,總算大家都有賺。

大埔陳奕迅攝

大埔陳奕迅攝

不過咁。我都知九巴唔會咁好死。總結嚟講九巴都係想借重組為名,慳皮為實。只不過希望九巴高層可以明白,其實有好多情況下,開源比節流更有效益,起碼都一邊開源一邊節流,而唔係得節流囉。收手啦,咁落去其實只會每區都bam,浪費大家時間,資源繼續浪費,何必呢?



原文連結