2014-06-12

【主場新聞】人在中環 - CK:繼續靚 (2082)


就算外面既氣氛幾咁凝重,壓力幾咁沉重都好,公司既pantry,總係會聽到啲輕鬆既話題。

這天,幾個新手媽咪,在討論著「如何可以生完仔之後都繼續靚女」的話題。言語間,我感受到佢地心入面既不安,對於生完BB之後,自己既身材樣貌「無復當年勇」感到很無奈。

於是同事跟我說:「老細,你係男人,你feel唔到呢種壓力架啦。男人係越老越吸引,但我地女人,一生完仔之後,乜都走晒樣啦。假如個老公唔要我,我要逼住重新投入個『market』裡面,我哋真係冇晒『議價能力』呀。」

「你哋係咪產後抑鬱呀?」我隨口爆了這句話出來:「你哋啱啱先做人阿媽,人生新階段嘛,唔係應該開開心心咩?做乜諗啲咁灰既嘢?」

我心裡面還有一句說話沒有問出口:「你哋啲老公,有嫌棄你哋身裁樣貌走咗樣咩?點解要諗有關『重新投入返個market既問題』?」

*****

我有唔少同事,一畢業就響我既公司度做。經過咗咁多年,我親眼見證住佢地由「脆卜卜」既年紀,過渡成為「人哋阿媽」既人生階段。OK,呢幾個同事,依家都已經三十過外,仔都生埋啦,如果要單憑外表去judge,肯定冇可能同佢地二十出頭青春無敵既時候睇齊的。但係一個女人靚咁靚,其實係一個overall既感覺黎既,當中有太多不同既element。如果到你三十幾歲既時候,仲要同個二十出頭既妹妹仔sell埋同一樣嘢,咁,肯定係輸硬啦。

講到呢度,同事就開始將問題歸究我哋所謂既「男人天性」了:「唉,老細,你唔洗安慰我哋啦。男人有邊個唔鍾意脆卜卜、青春無敵既後生女?邊個男人唔係睇樣睇身裁?二十幾歲既男人,鍾意二十幾歲既女仔;三十幾歲既男人,又係鍾意二十幾既女仔;八十歲既男人,都係鍾意二十幾既女仔架啦。我地呢亭生完仔既三字頭女人,冇market架啦。」

係咪真係咁呢?如果要我答,我既答案會係好「灰色」的。實際上,好depends你想響個女仔既身上得到啲乜嘢的。如果要搵個女仔拍拖既話,二十年前我肯定唔會搵個超過廿五歲的。但今天當我已經進化為一個中年發福既核突中佬,你叫我同個二十出頭既小妹妹拍拖談戀愛既話,對我嚟講應該係受難多過享受。畢竟唔係每個人都有彭大導既能耐的。

*****

於是同事又問我,以一個「中年男人」既角度,女人點樣先叫靚。well,taste既嘢,好personal架喎。不過我覺得呢班同事對男人有一種誤解,總係認為,男人睇女人,係會睇得好detail…例如睇下佢眼有幾多條皺紋、個body firm唔firm、下爬對落啲斑班深色定淺色…

呢啲嘢,後生果陣或者真係會認真去睇的。但係麻甩佬去到中年,視力都衰退啦,有啲女人自己好care既嘢,其實唔用放大鏡係幾乎睇唔到的。女人對男人既吸引力,係種overall既感覺嚟既。冇錯,外表係會隨住歲月而日漸走下坡的,但好多人唔知道,自己既吸引力之所以越來越差,係因為「氣質」走下坡,而非外表。

我知咁講好老土,但我成日都話,心地好既女人,通常唔會太醜。心地好加埋「懂大體、知進退」既女仔,不論你年紀有幾大,又或者有冇生過仔,即使樣子唔係好靚,通常都會好有吸引力的。心地好唔好可能係天生既,後生既時候,樣靚身材正可能可以掩蓋好多內在既缺點,但係隨住年紀增長,呢個mask會變得越來越薄。軀殼裡頭既真正氣質,會滲得越來越多出嚟。我知咁講有啲難聽,但有啲心地麻麻既女人去到某個年紀,總係有啲「八婆味」會滲出嚟。真正趕客既,唔係佢地個樣,而係嗰種讓人唔舒服既氣質。

*****

我跟同事們講,你地冇問題丫…起碼我feel唔到嗰啲好讓人吃不消既氣質,從你地身上面散發出嚟。不過我話,吸引力同自信關係都幾密切,你自己成日擔心自己冇咗吸引力,咁吸引力真係會慢慢消失的。

還有,生完仔身材走樣…你地啲老公,會諒解的。(如果咁都話唔諒解,其實係咪代表你嫁錯人?)

連結:人在中環



原文連結