2014-06-08

【熱血時報】黃洋達:黑白分明仲可以各打五十大板? (2773)



6月6日衝擊立法會事件,一晚過去,看了很多討論。葉寶琳、陳景輝、張秀賢等左膠,肆意抹黑就預左。852郵報、輔仁、謎網呢啲立場出發嘅,係唔係都要批評熱狗,都意料中事。

成件事根本唔係乜嘢羅生門,也不存在甚麼各說各話,左膠要行動,佢哋叫人來聲援,我哋咪嚟囉,明明佢哋叫人嚟,嚟咗又話抽水,由頭到尾我哋都尊重大會決定,你話要佔領,我哋頂住唔畀警察清場,你哋要影相我哋閃開,你哋話勝利咗囉,咁我哋咪走。

老屈抽水、老屈散水、仲要老屈我哋鬧村民。

根本呢件事,就唔係雙方爭拗,係熱血公民無故被攻擊。

但有一啲扮作持平嘅人,係一件黑白咁分明嘅事上面,都仲可以扮晒嘢,話咩睇完片都未知真相,講咩雙方各說各話,喂!成件事有條片,個幾鐘頭無刪剪架。我明明己經出咗條無刪剪現場片段,睇到晒成個過程,仲可以有人話片段係移花接木嘅……仲要有人話睇唔晒個過程……

然後仲要話雙方都將私怨睇太重……大佬,咁都仲「雙方」?你冇嘢下嘛?我哋不問黨派,不問立場,明明主辦方頭領人物,近呢兩年來多番抹黑我本人同熱血公民,但佢話要增援,我哋一個鐘內即吹雞百幾人落嚟,你仲叫我拋開私怨?我哋向來都唔睇咩派系架!你哋唔好以己度人,你哋小心眼,唔代表我會咁架!我哋向來唔理私怨,但係左膠呢?話完大話抹黑完,畀人拆穿後,就話大家唔好拗啦,大家放下政治成見啦……我就係向來冇政治成見先嚟增援嘛,結果咪就係:相就左膠影,門就熱狗頂!

熱血公民被老屈唔係第一次,我哋都慣晒,但我哋都好少可,試過好似今次咁,是非黑白咁分明,成班左膠直頭講大話,生安白造,誹謗,咁嘅情況你仲可以各打五十大板?信報抹黑,今日明報記者仲走哋問我乜鬼村民被辱罵事件,我先係畀人辱罵嗰個呀……而家啲傳媒,水準有冇咁低呀……

面對是非黑白分明的這樣一件事,一些偽中立分子,花生友,自稱評論人嘅,純粹因為私怨,因為害怕熱血公民,因為討厭我本人,望住條片,睇住無刪剪全程直擊過程,然後都可以睜大眼說謊,話呢件事係羅生門……這些論調,才是最邪惡的。

好了,立法會佔領唔到,事件失焦,可憐了東北議題,有人走嚟同我講,唔好再爭拗啦,集中返討論事件,唔好再模糊東北事件焦點……大佬,我係去幫手,然後無啦啦畀人抹黑咋喎,我做咗乜野事去模糊東北議題焦點啫?我做嘅嘢只係,響應佔領行動去支援,全力阻擋警察清場,然後被老屈被抹黑咋喎……咁模糊焦點嘅責任,好明顯係抹黑熱血公民嘅人身上啦,你而家要我去負責聚焦返個議題?我真係冇咁大能耐喎!

其實左膠只要唔抹黑,你哋要大合照又好,要畀啲掌聲自己又好,我地再不滿都好克制,任由你哋做(有晒片拍住架),偏偏你哋要將件事搞到咁,抹黑嚟支援你哋嘅人,搞到以後仲邊有人敢嚟支援?結果又係苦了居民,傷害了運動。好心你哋放下私怨啦……

由6月4日香港人的六四集會,到6月6日衝擊立法會,我哋都只是為理念而行動,受到幾多抹黑攻擊,我哋不在乎,我哋慣咗,而且也影響不到我哋。

有人話經過今次之後,以後好難再佔領立法會,我唔係咁睇,新媒體運動、驅蝗、本土六四,樣樣嘢啲人都話難架,結果咪又係一一闖過來!膠人們總是一再低估群眾,永遠擁抱失敗主義!但是,成功之前,我們絕對不會放棄夢想!

政府一旦提交假普選方案上立法會,沒有公民提名,我們就佔領立法會,我相信你們會做到!

(附帶一提:呢篇文我帶病寫嘅,係咪即刻有說服力好多?而我,只係一個石硤尾居民。)


【六月六日衝擊立法會真相全記錄】(無刪剪版)
http://passiontimes.hk/?view=prog83&ep=127

原文連結