2014-06-11

【熱血時報】Julian Yip:學下毛澤東啦,香港人 (1873)


昨日中共推出「香港收皮書」,將《中英聯合聲明》、一國兩制及《基本法》撕成一堆廢紙。收皮書一出,Facebook 上立即有唔少人 RIP,哀悼一國兩制。

香港人一遇到困難及不如意事,第一個反應必定係「哀悼乜乜物物」,「冇架啦,乜都冇啦」,「XX最黑暗既一日」,「算啦,都做唔到啲乜架啦,佢話點就點囉」。香港人跟隨中共主旋律,一日到黑鼓吹狗屁不通既「正能量」,但其實骨子裡不知幾咁負面及頹廢。無計,香港人被注射咗悲情嗎啡長達25年,上晒癮。

一國兩制係我心目中,早就蕩然無存,而我亦老早視《基本法》為一堆廢紙,所以中共呢本「香港收皮書」對我嚟講,只係一個講過嘅笑話。

哀悼,對住死人先會做。香港未死,香港人更加未死。如無意外,我哋同我哋嘅下一代,將會留係呢片土地上,夾埋生活多一百年。中共要香港「收皮」,如果呢一刻就哀悼,開始為自己注射悲情嗎啡嚟麻醉自己,咁唔該而家就了結自己,因為當你將來目睹自己子女毫無尊嚴地苟且偷生,佢哋反問你點解生佢出嚟承受屈辱嗰陣,你將會生不如死。

但究竟點算好呢?1949年8月,美國國務院發表《中美關係白皮書》。白皮書推出後,毛澤東一連寫咗五篇文章反擊美國政府,並鼓動人民對抗帝國主義。佢寫嘅第一篇文章,標題只有八個字:「丟掉幻想,準備鬥爭」。

學野啦,香港人。



原文連結