2014-07-07

【蘋果日報】添馬男:特首夫人放過我們吧! (578)

■上周五,特首夫人斥中大高級講師蔡子強評論其女割腕的文章「刻毒、涼薄、冷血」。資料圖片
梁特首夫人衝住蔡子強批評二人將女兒割腕也spin一番,大發雷霆指他「刻毒、涼薄、冷血」,成件事好「騎呢」,堪稱自2003年董太「重裝備」到訪牛頭角下邨叫阿婆洗手洗手洗手之後,最爆之特首夫人公眾災難。
首先自女兒向《信報》表達心聲,揭露在父母擺佈下公關Show,實情已是一場公關災難,梁氏夫婦理應低調,因為實在太難睇,等事情過去扮冇事發生先係上策。而事實上,六月下旬的民情輿論關注點已轉移至全民投票、七一、佔中等政治議題,有鬼人得閒理佢一家人。而主動再提出女兒自殘,叫傳媒公眾畀空間女兒,係梁振英本人,當時已奇怪,但因梁言論冇挑釁性,大家不以為意。
到梁太作第二次回應,不論時機、措詞、表現、姿態,全部都錯晒,而且仲錯得好離譜。女兒自殘父母憂心乃人之常情,只要做回父母本份,大家都會給予同情。但梁太卻反其道而行,將學者蔡子強當箭靶,以為就此可以轉移視線,引起市民同情,結果是反令自殘事件再一次進入公共領域,本來未看過蔡子強評論的都拿來看。
蔡之批評出發點,是女兒自殘,特首夫婦竟然當公關show來spin;從這層次而言,公眾絕對有權評議,因為這種處理手法是關乎一個政客品格、操守、修養。公眾關心的,並非特首女兒自殘原因,這的而且確可歸為「家事私事」。公眾關心的是,當女兒發生自殘事件後,仍要精神狀態不穩定之女兒去配合特首夫婦做公關show,拍公關照,這是關乎政客個人品德修養。
蔡子強評議的,是這種視公關比一切重要嘅政客行為,是否符合大眾期望?市民會關心,日後有乜大型災難時,特首夫婦會否又撲出來做公關show呢?大家都記得,2012年國慶南丫島海難事故,當晚梁振英便陪同中聯辦官員,第一時間去醫院做公關show。
梁太記者會上不論內容及演繹方式,均令人側目。極端言詞除非用於殘忍兇案譴責兇手,如果用來批評學者評論文章,就over晒。更爆笑係特首夫人air quotes手勢,即食指勾起放在頭兩邊,盡顯特首夫人修養水平,air quotes乃窒人、諷刺之手勢,在外國通常係藝人搞笑show寸人,而且唔會用一隻而係兩隻手指,代表double quotation marks。特首夫人自創單手指air quotes寸蔡子強「所謂學者」,諷刺佢唔夠班,唔單止有失身份,個格亦好衰,事後更出現大量網上惡搞瘋傳。
特首夫人係一個公眾角色,今時今日香港政局已經夠樣衰,拜託,特首夫婦,請高抬貴手!放過香港人,畀番安靜空間香港人吧!

添馬男

原文連結