2014-07-13

【熱血時報】Anna Ip:香港的墮落令我好難受 (2494)



近排呢,情緒低落。非因哀悼每日 unfriend 幾個𠴱啲所謂友情,幾十歲人好似小朋友咁玩絕交自己都難為情,不過認真唔想睇見佢哋ike咗啲幫乜出聲呀,仲加埋佢哋大力讚賞建制議員的 comments,老人家,好易血壓高呀。

可能我份人相對悲觀,對政改方案不存厚望,咁嘅政府會有咩好野出台呀。有人會話,普選唔係萬靈丹,係,不過睇下呢班唔係由人民選出嚟嘅庸官同議員嘅質素,點解一向自視甚高嘅香港人會甘心畀佢哋管呢?

跟住又一定會有人撲出嚟話,英殖時都冇普選,你哋又唔出聲?係囉,就係想話你哋知, 𠴱時幾國泰民安至得㗎。大家有平等機會,肯做就得。 𠴱時個政府幾可靠,毋須人民監管,我信得過交嘅稅會用得其所,唔會俾人飲茅台飲咗去,舞獅舞咗去囉。 𠴱時我信有咩危險可以報警,警察叔叔會幫我,而唔係會揼我架。

諗真我算幾幸褔,可以經歷香港嘅黃金時代,個人認為係七、八十至九十年代初。𠴱時仲後生嘅我,最大的擔憂係考試唔合格,放工同邊個男朋友去街啫,點解而家啲學生要憂國憂民嘅?

近幾次大型社會運動後,社會分歧越見嚴重,香港急速沉淪。689太嘅潑婦罵街,富二代以拙劣的邏輯思維獻醜,制服部隊罰抄表心跡,白頭佬更來一個東施效顰式簽名活動,建制議員下三濫式地玩弄權力,都係𠴱句,水平低,費事同佢地一般見識。

但到咗最上面𠴱啲龍頭企業,所謂宗教領袖呀都出嚟講嘢就真係好恐怖。為咗媚共可以得到嘅好處可以去到幾盡? 家下個議會好似街市咁,假學歷嘅人可以做議員,呃錢貪錢嘅可以甩身,開會可以唔跟程序,為咗維護某些人嘅利益就咩法案都可以監粗嚟。跟住仲出黎窒你班小市民,簡直係道德淪亡,要幾無恥有幾無恥。仲問返你咩係良心,頂。

一班所謂社會上嘅領袖為咗護主而自眨身價,無恥地盡力演出,毫不要臉。成個社會的道德標準被拖垮。 最慘係仲有人 buy,好似我有啲朋友咁,好似𠴱班聽主教講嘢有份笑𠴱啲。

好難受,唔係有無普選,係香港的墮落。


(圖片來源:Ross Pollack via Flickr

(本文原載於作者面書,蒙作者答允轉載。)


原文連結