2014-07-24

【am730】王慧麟:八分之一 (1223)


響深圳南山區麗紫路一號負責清潔之阿姐話,依家奔走各方之人士都異口同聲話,北方人士已經決定咗,提委會大抵組成不變,民主化一啲係OK,但有樣嘢就傾緊,究竟出閘係按照以前選委會嗰陣,八分之一的委員OK就可成為候選人,定係由始至終講嘅機構提名,要一半以上提委OK至得,仲有係未用全票制添!
清潔阿姐話,依家就係響八分之一,以至過半人數之事情上遊走緊。
清潔阿姐既然有能力響麗紫路搵食,身手同關係一定非同凡響。早響舊年,全世界都未傾方案嗰陣,民主之父馬丁提出過一個提委會方案,核心內容就係八分之一就可出閘,呢個方案馬丁後來收番。當然,建制派聽完好happy,仲話有得傾。聽麗紫路一號搵食之阿姐話,查實直到依家,有部分北方人士仲覺得馬丁方案是個好方案。
不過咁,清潔阿姐都未必知,依家馬丁已經轉咗支持公民提名好耐。依家北方想轉頭話,佢年前講嘅方案very good,即係想馬丁畀人噓爆咩?一年多之光景,提委會民主化已經唔係一個最主要之政改agenda,北方大人假如依家抬個馬丁方案出嚟向泛民議員推介,即係要博泛民唔通過政改啫!咪玩啦!
即係話,依家漏出來之口風,非常唔樂觀,大家無需因為泛民可以同北方高級官員落嚟談判就好開心。點解會咁樣?國情界人士話,依家成個中國都係要(對內)強硬。一有反對之苗頭,就一於少理,立即搵碌導彈射瓜佢。既然上面硬到甩肺,點可能期望佢會聽你講呢?
仲有一樣嘢,就係既然上面覺得,提委會乜嘢民主改革都唔應發生嘅時候,大家都應該估計到,一定會來一場六國大封相啦。然而,既然上面係強硬主導,又點解依家叫好打得,約一啲提倡其他方案之三尖八角人士,出來交流呢?
清潔阿姐話,三人組約見嗰啲學者方案呀之類,做場戲之嘛,其實都係借呢類人過橋,營造一個良好之社會氣氛,畀人感覺,上面仲係兼聽,等呢班學者熱血上頭,以為其方案被採納,於是就會谷晒精力上腦,發晒狂咁樣四圍sell政策sell公提A貨,或者成為提委會民主化A貨之代言人,日日同激進之學界及激進派開火,day day又同提委會民主化之建制組織開火,將焦點由普選轉為社會對立及衝突。就響大家睇住火花四濺之大辯論之時,八月底之人大常委報告之中,就會以依法搞普選為名,掃走晒任何學者方案等。咁樣,學者方案就會完成任務,丟番去歷史垃圾堆而已。
聽完清潔阿姐所言,既然公提已經無望,大家就要小心某些泛民朋友,會連「八分之一出閘」之最低條件都唔企硬,特別係北方大人可能會將出閘門檻調低些少,調至三成至四成(即三分一或四分一出閘),某啲泛民會否放棄八方之一出閘,而去擁抱一個爛方案呢?木宰羊(意謂不知道),但煩請大家都幫下眼,假如有人想轉軚,盡早單聲也。(二之二)



原文連結



1 comment:

Anonymous said...

"某啲泛民會否放棄八方之一出閘,而去擁抱一個爛方案呢?"

唯一會支持爛方案的會是黃毓民, 因為他是無間道. 不過, 要4人轉軚才可以通過爛方案, 反轉豬肚現在不是時候.