2014-07-15

【主場新聞】庫斯克:放榜日談人生四件事 (2619)


關於今日放榜,我不打算長篇大論。總之,這個世界既野,多勞多得,尤其是讀書考試。成績當然唔代表一切,不過會令你人生道路既選擇多啲。無論結果如何,請記住四件事:

1. 成績只係你人生既一部份,好成績代表係某方面競爭力會好啲,但唔係絕對,例如有啲人口才好啲,有啲人外表殺食啲,有啲人煮野食叻啲,有啲人坐響個位度日日重覆做同一樣野叻啲,有啲人畫野叻啲。總體嚟講,請搵到自己強項,加以發揮,唔好人云亦云迫自己做自己弱項既野,浪費自己生命。

2. 每個人既人生目標唔同,冇人話過呢個世界一定要幾多歲買樓,幾多歲結婚,幾多歲升咩職,月入要幾多,但最重要係知道自己想做乜,到有一日,touch wood醫生同你講你仲有半年命時,你望番轉頭唔會後悔。呢個世界,有人名成利就但妻離子散,有人平淡一生但知足常樂。當你知道自己想做乜既時候,就應該盡力去做到。

3. 食得咸魚要抵得渴,追求目標既時候,唔好做帶驢入城既父子,太在意人地點講,亦唔好下下同人比較,專心做好自己想做既野。暢銷書Outliers提過10000 Hours Rule,講既係如果你要響某個方面做出成績,就至少要響果件事情上花超過10000小時。呢個rule你可以唔信,但你唔好幻想自己係骨格精奇,百年難得一見既天才,你唔付出努力,就99.9%唔會做得特別有成績。

4. 有意義既人生,唔係一切都順風順水,如果係就恭喜晒(未到最後一刻冇人敢寫包單)。人生一定係充滿挫折和梅菲定律--學習、朋友、愛情、家庭、事業、健康,一定會響某時候響某方面出問題。張愛玲講過:

「生命是一襲華美的袍,爬滿了蚤子。」

你到人生某啲時候就會明白,你可能細細個已經明,亦可能聽日明,亦可能到你三四十歲先明。總之,有意義既人生,唔係講人生一定順風順水,而係你點去盡力應付,而且從中搵出意義。

總之,放榜成績已經印好,冇得變。有得變既係你DSE畢業之後你點樣行你既路。中學日日被管住既歲月已經結束,你已經係一個成年人,開始要對自己日後既每一步路負責。希望大家一切順利,亦希望呢段短文能夠俾到少少參考大家,幫到你過有意義既人生,日後既日子都能夠活得豐盛。

原刊於作者博客



原文連結