2014-07-28

【輔仁媒體】Clarine Li:TBB 《我們的天空 - 同根生》:醜化港人 (13488)

老老實實,我就真係好少會睇TBB,今日難得早返屋企睇下喇,套野就叫做《我們的天空 —同根生》,第一個場景,熟到不得了,上水喎!水貨城丫嘛!我就住係入面!

心諗︰好呀!有多套野幫我地上水居民吐苦水講下我地既苦況啦!

點知第一節都未完,我只覺得呢套野美化大陸人,更過份既係醜化香港人。

其中一幕:有人係大街撞跌老婆婆,劇情的確唔係個兩個新移民(一對母女)撞跌老婆婆,個兩個新移民仲走去扶起佢,但就一班香港人圍埋去屈佢地撞跌老婆婆,最後,劇中正拍攝上水水貨情況既記者就挺身而出,拎出證據幫新移民澄清。

對於呢一幕,首先,我相信唔會真係咁岩有人影低到低邊個撞到邊個﹔其次,我住咁耐上水,問心個句我係有見過婆婆公公跌親,但真係無見過大陸人會停低扶起佢地,反而我成日見到既係拖住車仔一箱二箱既大陸人撞到人而唔道歉,甚至就係呢啲拖住車仔一箱二箱既大陸人撞跌人囉!

容我講個親身經歷:最近,我見上水開左個新商場,入面開左幾間食肆,有晚就約屋企人試下間酒樓,入到商場都未上到酒樓已經見到海量大陸人(包括售貨員同侍應),雖然唔係好鐘意但其實都習慣左上水就係好多內地人,但當我入左升降機之後,突然一班大陸人禁返開度門入左黎,其中一個著住高跟鞋踩左我一腳,本身都真係無謂小事化大,點知佢仲撞左我幾下,一句道歉都無,我就講左句:「踩到人都唔道歉仲撞撞撞。」當事人唔知係唔係唔識聽廣東話所以無比反應,但佢隔離個男人就幫佢出聲講句:「下?佢踩到你,痛個個係你又唔係佢,佢洗乜道歉?」然後佢報以一個好威威既笑容離開部升降機好似錯個個真係我咁。其實,對住呢種理論,我真係覺得我輸左,鬼叫佢地係強國人咩。

留係我腦入面既另一幕︰新移民囡囡搵學校唔識英文搵唔到學校,然後囡囡就話會比心機追返啲成績。無問題既我都知好多內地人下一代係好勤力,但真係唔係個個都係咁,點解我知?因為我會入同區小學做補習,往往成績差既都係新移民,莫講話更努力讀書追分數,叫佢地串多兩個英文字一陣默書佢地都唔肯溫。發奮?唔係無既,只不過真係唔係個個都係咁。

順手提一提,佢地話個囡囡第一次測英文係零分,第二次有二十分,進步左20倍,其實係我認知既數學當中,零乘二十都係等於零,進步二十分係值得讚但真係唔係進步左二十倍。﹙希望我無記錯對白﹚

仲有一幕,新移民媽媽返工整親,然後就有問有冇工傷,個經理就話佢係自僱人士,一副不負責任既態度要佢自已負責仲叫佢唔洗返工,其實,香港既僱主唔係真係咁無良心!更何況新移民媽媽知道香港有勞工保障,返工之前唔問清楚可以怪邊個?如果你覺得我咁講好無良心好無同情心,咁如果而家受傷既係一個岩岩港大畢業既後生仔,大家只會講係佢自己返工前唔了解唔問清楚自已有咩保障。

印象中尾二個幕︰家中老人對住新移民媽媽,話個仔消失左,婆婆講左句對白意思係個仔為左申請老婆同個囡落黎先賭錢,但其實早係十年前香港已經講緊內地人黎港假結婚,不知有幾多內地人呃香港人感情,為既只係申請黎香港,其實假結婚個個國家都會有,真係無必要講到香港人想申請佢地落黎想到去賭錢或者唔顧唔理家中長輩…

真係最後,套用返劇開頭一個香港人既其中一句對白:「香港係一個金玉其外,敗絮其中既地方」,所以請大陸人唔好再慕名而來,或者攪盡腦汁移民黎香港喇,尢其個啲申請左甚至己經落左香港但日日不停鬧香港話呢樣唔好個樣唔好,一副十分嫌棄香港呢個地方既大陸人。

套劇真係太醜化香港人喇,維穩都唔好咁過份。



原文連結