2014-07-15

【輔仁媒體】Cmw Boni:關於留學德國,我想說的是… (1052)

柏林

首先自介一下。我係第一年DSE考生,喺香港讀咗一年APA之後,就去咗柏林讀咗八個月語言學校,喺大半年除咗讀語言之外,仲同時準備入德國嘅藝術大學。啱啱見聽日放榜,所以想講一講關於德國留學嘅嘢。

如果講起去外國讀書,好多時大家都係諗起去英美加澳紐,但老實講唔係可以個個都負擔得起嗰度嘅生活費,更加唔好提貴到hihi :o) 呢一方面,其實德國會好好多,就算你係「外國人」,姐係唔係拎BNO過去,你都可以用local fee去讀。德國有啲省分唔會收學費,但有啲省嘅大學會一學期收500歐。咁其實計返條數,抵讀過喺香港。

咁佢地有咩係出名呢?佢地嘅工科好出名,尤其係香港成日比人歧視嘅「N展」(engineering),有次我有個讀engin嘅朋友嚟咗,我屋企landlord聽到我朋友讀N展,雙眼真係發光,因為嗰邊尊重工程專業,真係叻嘅學生先會讀到N展,咁自自然然質素就高。除咗工科之外,佢地嘅music school都好出名,(要知道德國出咗好多出名嘅音樂家,例如係巴哈,舒曼)唔少嚟自世界各地嘅學生都會得登用一年時間準備考入去佢地嘅學校。

除此之外,生活費唔係真係好貴。如果你去前東德嘅城市,例如係萊比錫,生活費會更加低。就例如係一盒一公升嘅奶,只係賣緊0.65 歐;如果出街食Kebap (姐係一款土耳其嘅包),價錢都係講緊三至四歐。當然,你要食asian嘢就當然唔只啦 :o) 但係想講嘅係, 識食一定係自己煮,而且分分鍾會平過喺香港生活。

最緊要係,德國似終相比起其他英語系國家,無咁多香港人,你會容易同當地人,又或者係其他國藉嘅同學blend in到。去得外國,我估算你都係會想學下自己獨立自主嘅能力。當無咁多嚟自同一個地方嘅人嘅時候,其實反而有助自己獨立。

咁講到尾,去德國讀書有咩要求?

如果你係舊制嘅AL學生,就要2AL/1AL+2AS全E;如果你係新制DSE學生,就要連兩科選修科都要全3。咁當然,如果你想用德文讀,你就要考德文試。就好似我考嘅柏林藝術大學(Universität der Kunst Berlin)而言,你就要考到德文B2程度1。如果你喺德國讀語言學校,由初學者學到B2程度,大約需要一年到。咁當然,你可以選擇用英文讀,而德國都有開設唔少用英文讀嘅國際課程。不過個人覺得用德文讀選擇係會多好多。

喺香港嘅German Academic Exchange Service (德文: Deutscher Akademischer Austausch Dienst, 簡稱DAAD)分別喺14號同15號有諮詢會,時間係14:30-16:00,可以有一個更清晰嘅概念到底德國留學到底係點。

  1. 所有嘅歐洲語言都係根據「歐語能力評量共同參考標準」去分咗六個等級,由A1開始去到C2, 如果要夠入大學,大約B2或者C1都可以。
    詳細資料:http://www.goethe.de/ins/cn/hon/ihr/stf/cnindex.htm


原文連結