2014-08-27

【熱血時報】雅典娜:睇醫生想打尖,請你返大陸 (7597)


我係一個任職於某航空公司嘅小地勤,咁我今朝見眼睛有啲唔舒服,就去明愛醫院睇眼科。去到眼科,有個阿叔大大聲喺度嘈:「我十一點幾就喺度啦你叫我輪下晝!我喺大陸睇醫生都唔會咁啦!我唔理我一點前要見醫生!」又搵晒掃把又話要投訴,然後我喺後面偷望一望佢張覆診紙,預約時間係寫十點。

個阿叔越來越嘈,圍觀嘅人越來越多,連保安都嚟埋。護士叫我入房見醫生,我行去房門口叫個護士等等,然後就忍唔住行埋個阿叔度 _ _ 佢。

「阿叔,唔係大聲就有醫生睇架!你遲到就要重新排過架啦!人哋姑娘都話俾你排今日下晝唔使你重新約過第日啦,你仲想點呀!」

佢答我:「我十一點幾嚟到……」

我截住佢:「張預約紙寫住幾點呀睇過?哦,十點呀嘛,咁你即係遲到啦!你估惡就有醫生睇惡就大晒架?大陸唔會咁你返大陸睇啦!呢度香港嚟架講道理架!排隊啦!」

佢答我:「針唔拮到肉唔知痛……」

我截住佢:「我 _ 你啦呢度排得隊嘅邊 _ 個唔係病架?邊 _ 個唔係依時依候排隊覆診架(我指住坐喺度等緊嘅病人)?針唔拮到肉唔知痛?我就嚟盲添呀!你咁 _ 大個人男人老狗自己遲到仲要走去恰 _ 啲女人?恰 _ 人地打份工怕投訴唔敢 _ 你(我指住個護士主管)?你醜唔醜呀?走啦!」

最後個阿叔無聲出走咗。而個護士就真係喺門口等我 _ 完個阿叔,一路無叫第二個先等我入去。我入房嘅時候個護士報以一個微笑。

呢個微笑好熟悉,就係我平時對住一啲幫拖客嘅微笑。

我以爲我讀得書少先會俾客 _ 怕投訴唔出得聲,原來而家連讀得書多嘅前線醫護人員都會俾客 _ 怕投訴唔出得聲。呢個到底係咩世界?


(本文原載於作者面書,蒙作者答允轉載。)


(圖片來源:Wikipedia Commons



原文連結