2014-09-19

【熱血時報】姐死姐還在:如果罷課要比個缺點我,拿拿聲比半打嚟啦… (1308)

見到有學校話罷課當曠課,要記缺點。如果個缺點係爭取民主嘅代價,拿拿聲比半打嚟啦,趕時間呀。正所謂死有輕於鴻毛,重於泰山;爭取民主,要求真普選都要記缺點,咁因為欠交功課冷氣費、打架、遲到記缺點個班友仔,你地慚唔慚愧,我要求欠交功課最少要罰剝奪小息去小食部權利終身。

甚麼都不怕,有課趁嫩罷...

有得罷,當然係趁嫩罷。你愈長大,你嘅opportunity cost 只會愈高。唔通讀書唔罷課,grad 左會有時間罷工?讀書罷課又話影響學業,返工罷工你又話影響社會經濟,擾亂公安,咁係唔係要拎左長者卡先可以參加抗爭?到時我骨頭脆到,比警察推一推都身亡啦。

革命真係尚未成功…

「學生唔好搞咁多野,比心機讀書啦」,孫中山聽到都想起身掌摑你,孫中山唔係讀書時發起運動推翻滿清,你班友仔可能仲要紮腳,以及剃到個頭條髮線係中央啦。

個世界對年齡向來都雙重標準,呀媽叫我做家務個時實話:「咁大個人,咩都唔做」;到駁佢咀個時就話:「你咁細個,識咩呀你」。又要D 細路上通識學批判性獨立思考,又唔比人思考完以行動抗爭,究竟係唔係訓練D 靚仔用念力為社會作出貢獻?咁畢左業唔好搵工做啦,係屋企用念力推動香港經濟啦。

明知不可為而為之…「做騷」也…

李國章:大專生明知不能改變人大常委的決定,罷課令人覺得是「做騷」…

「做騷」黎講,真係唔係政府個皮…引用返視帝黎耀祥嘅講法,政府年年都「爆騷」。

-->諮詢,諮完唔聽我地意見,係唔係做騷?

-->董太SARS去清潔,係唔係做騷?

-->mug 太豎起手指鬧蔡子強,係唔係做騷?

-->立法會個元秋,係唔係做騷?

所以我好明白點解唔發個牌比WIKI WONG,政府日日都有騷睇,你班市民仲唔知足,仲要多個電視台「做騷」你睇?

篇文真係長過特長夜用片M 巾;其實重點只有一個:我撑罷課。

成日話香港係個自由嘅特區,選擇罷課爭真普選,定選擇繼續上堂袋住2017張票,呢D 根本係個人抉擇。係我眼中,就好似去MK拮魚蛋一樣,有辣有唔辣,任君選擇。我完全睇唔透點解又要記缺點,又要叫學生退學,做咁多嘢去干擾罷課嘅決定。

PS. 話說,我張畢業證書係印左校長堯堯個名,好彩唔係李國章個名。我覺得印李生個名係上面衰過印半打缺點。



原文連結