2014-09-10

庫斯克:張翠容的思考藝術 (733)

(截圖來源:張翠容《左右紅藍綠》錄影片段http://goo.gl/6ymgJQ)   睇呢集《左右紅藍綠》,發現張翠容真係中晒毒。 當全世界都講緊北京壓落嚟嘅選舉方案有幾似伊朗,咁樣有幾大鑊之際,佢就響個節目度話呢個假民主制度有咩合理嘅地方,例如雖然係教士控制嘅委員會篩走唔符合佢地心水嘅準候選人,但係呢個制度: 符合伊朗國家安全需要; 比香港更好,因為有六個候選人,比香港多; 委員會欽點後一人一票選總統,選民取向仍然對候選人有回應嘅壓力; 雖然改革派候選人全部被篩走,但佢地仲可以爭取到當選者回應訴求,例如婦女終於有權跳舞,因為upload自拍跳舞片段而被拉嘅人可以放番(嘩,真係好進步呀); 1979年伊朗革命推翻帝制,轉變成神權國家,係有民意基礎; 而家伊朗仲好多人支持神權政體,伊朗式民主有佢嘅特色。 佢係咪真心?我睇唔透,但真係大開眼界。 其實要駁佢實在太易,但係反駁啲咁低層次啲論點,真係幾浪費時間。 伊朗式神權假民主有咩唔好?咪就係伊斯蘭什葉派教士話晒事,令成個選舉選來選去都係合教士心水嘅人,而成個社會制度就長期以宗教之名打壓言論思想自由、選擇生活方式嘅自由、婦女權益等等。點解有好多人支持神權政體,就可以搞個制度容許特權階級打壓人權?呢個國家連跳舞自拍都會犯法架大佬。乜張翠容唔係好關心中東地區人民嘅咩?點解會對於神權國家打壓人權睇得咁理所當然? 仲有,1979年嘅巴列維皇朝腐敗獨裁係事實,當時革命嘅人有理由亦係事實,但1979年到而家三十幾年,都仲係玩假民主神權統治,當初啲人支持革命政權,唔代表不民主嘅制度應該千秋萬世。而家中共都好興話人民響1949年「一次性授權」俾佢地話晒事架。 好多人支持神權,伊朗民主有其特色,意思即係其實伊朗式選舉都唔係大家講到咁恐怖啫,香港而家有票,真係唔要?香港都有好多人支持假普選架。 呢集《左右紅藍綠》大家睇到嘖嘖稱奇。不過大家唔駛太驚訝,一個曾經為梁美芬這種人拉票嘅人,其政治判斷力,如果唔係超強,就應該係超低,但兩者都有個共通點,就係認同梁美芬嘅政治觀。照咁計,張翠容能夠欣賞到伊朗式假民主正面之處,反而好正路。 我唔係人身攻擊,唔係麥卡鍚,上文每一樣嘢都有根有據,我咁樣批評佢,係因為佢維護伊朗式假民主呢一舖實在太荒謬,必須以正視聽。 (中國評論新聞2007年區選報導:連結)

原文連結