2014-10-16

【am730】狄港生:邊個先係傻 (5021)


這十幾天,看到太多,學到更多。我覺得最恐怖係有部分港人認同中共已賦予港人好大自由,覺得中共幫咗香港經濟好多,照顧港人福祉更多。認為佔中係無風起浪,破壞經濟,以一己私欲犧牲全民利益。
大家可能已忘記香港的繁榮穩定,其實係由幾代港人辛苦拼搏幾十年的成果。中共從未貢獻分毫。反而從50年代至70年代,大陸政局混亂,文革令國家民不聊生,如果冇香港人死慳死抵不斷接濟大陸親戚,中國人民都唔知點算!後來鄧小平推動中國經濟改革開放,又係香港商家率先投資大陸。內地開放港人到中國自由旅行,咪又係香港人帶頭以消費刺激大陸經濟。後來國企來港上市,咪又係靠香香港金融中心優勢。中國能夠大國崛起,香港人才是功不可沒!
鄧小平提出50年不變,確保香港穩定繁榮,是因為香港回歸中國前不但是東方之珠,經濟發展更是亞洲四小龍之首,作為亞洲金融中心,如果回歸後香港經濟下跌,即是共產黨提出的一國兩制失敗。
港英時期的確沒有普選,但香港人點解冇叫肥彭落台?點解會到今天仍會默認麥理浩係港英時代最傑出的港督?因為肥彭有guts面對議員質詢,因為肥彭真心鍾意香港的蛋撻!因為肥彭三位千金真係鍾意香港。因為老麥的確盡心盡力建設香港,因為老麥推行十年建屋計劃令升斗市民安居、建立廉署,一洗貪腐之風、建立郊野公園令港人可享綠色河山、啟動地鐵工程令交通更發達、推動行政改革令港人接觸民主、推行九年免費教育令香港從此冇文盲!
港英政權的確冇賦予港人普選港督的自由,但正如周星馳飾演的韋小寶所言,國泰民安,點解仲要反清復明!香港人繼續享有回歸前的自由及法治,是基本法賦予的法定條件,而這種既有的自由民主及法治,正在溫水煮蛙中一點一點消失。現在居然有無私奉獻的市民為香港人爭取應有的普選特首權利,你仲認為佢哋係自私傻仔?定係你先至係傻?



原文連結