2015-03-18

【評台】齊昕加油 (4982)


作為15歲時冒起被傳媒瘋狂捕獲既學生,我都有啲明白佢果種年少成名既壓力兼感覺……但梁齊昕無得選擇做唔做梁振英個女,亦都無得選擇梁振英做唔做香港特首,換句說話講,只要一日中央要梁振英做特首,梁齊昕都要繼續承受不必要既壓力。
分享

繼梁齊昕落老蘭擺相上Facebok後,今朝就接二連三發咗好多個Facebook Status,講佢呀媽點樣暴力對待佢,以致佢打算離家出走,睇返成晚既過程,特別係齊昕特別強調佢呀媽用「死蠢_」、「周街被人_」、「同人上床」、「去做雞呀」罵自已個女,應該唔排除整個爭執既出發點係源自齊昕落老蘭。

仲記得之前齊昕做訪問話梁振英早幾年連Facebook係咩都唔知,可見佢屋企人都唔似開明得去邊,而如果齊昕所引述佢呀媽既說話全部都係真既話,梁唐清儀可能真係覺得落老蘭等於隨便同人發生性行為,喺佢地對罵甚至動武既過程裡面,十居其九佢媽都係話:「你係特首個女你架,你點可以!@#$%^%$#@#$%^%$#@(下省一萬字)」,作為特首形象工程就梗係重要,即使CY自已BUY唔BUY都好,「修身齊家治國平天下」都一定係特首一家要promote既image。

按照六八九那種邏輯,特首一職總必然比父親這個身份重要,因為他是香港的行政首長,所以女兒就要滿足他的政治要求,即使齊昕親自報警都好,到最後都因為父母既阻止,搞到警察又走左,作為香港永久性居民就連到左禮賓府既救護車都上唔到。

其實作為特首次女,梁齊昕本身應該對政治興趣唔大,而佢既身世亦都令到佢根本唔太需要關心民生疾苦,我估佢唔多見得好撐政府兼擁護建制(否則家陣就做左咩青年委員公職在身啦),因著家庭、身世同背景是,點都會習慣於維持現狀,最好香港就唔好有佔領同唔好咁亂,但當佢今日要公開同全香港人講「佢因為自已係特首個女,所以無左正常香港市民的法律權利」,就證明六八九有幾咁瘋狂,依個唔係中共呀爺之類既政治立場問題,而係佢有幾CARE自己個女既問題。

雖然咁講好誇張,但我真係唔排除梁齊昕就係全香港最想梁振英落台既人,因為之所以今日搞成咁,家庭永無寧日、母親暴力對待、公民權利被剝奪,一切一切都源自佢呀爸係「特首」,若然佢呀爸唔係特首,即使呀媽要管,斷估都唔會管得咁誇張,只要「特首女兒」唔再係梁齊昕既身份,即使家暴問題未能完全解決,屋企裡面既火藥味都會少番啲。

當一個後生女因為自已屋企人係公眾人物,搞到自己要成為所謂「模範家庭」既乖乖女,聽聽話話讀書事業有成做專業人士,最好自已呀爸係特首就拎多兩個公職上身,其實真係好慘,亦反映出整個社會裡面,特別係班管治階層有幾咁反智,嗰種「成功人生」既概念套左落齊昕度,根本就係玩死佢,我完全唔明23歲女去蘭桂坊有咩問題。

唔計雨傘運動時既黃之鋒同埋Alexter,全香港18至24歲依個AGE GROUP裡面,全香港最多曝光嗰個應該就係佢,無錯梁齊昕單野的確好juicy,今朝Facebook上面佢既消息update率同雨傘運動佔領期間有得揮,但佢家陣只得23歲,仲要面對屋企、學業、感情同事業既壓力,傳媒如果對佢好就之後唔好瘋狂派狗仔隊24小時跟住佢,雖然你問我都好想食花生,但其實梁齊昕佢自己又會得閒喺Facebook派花生,真係盡可能比啲空間佢,政改又好政策又好點都好社會上仲有好多大事需要傳媒跟進。

作為15歲時冒起被傳媒瘋狂捕獲既學生,我都有啲明白佢果種年少成名既壓力兼感覺,當各派傳媒都想瘋狂訪問佢,了解又好報導又好乜都好,其實都離不開搵佢黑材料或(佢岩岩成名時的確有)做佢神,日日狂收電話同埋被狗仔隊影,嗰種壓力真係大到難以文字形容,我同佢最大既分別應該只係我有屋企人比既空間、包容同支持。

黃之鋒可以選擇做唔做學民思潮召集人,能夠有機會脫離傳媒曝光既壓力但梁齊昕無得選擇做唔做梁振英個女,亦都無得選擇梁振英做唔做香港特首,換句說話講,只要一日中央要梁振英做特首,梁齊昕都要繼續承受不必要既壓力。

齊昕加油,唔好輸比刻毒涼薄既母親。

原文載於作者fb,標題為編輯所擬,原題為〈【嗰種「成功人生」既概念套落齊昕度,根本就係玩殘佢】〉



原文連結