2015-04-23

【評台】對空姐,好多香港人都好刻毒、冷血、涼薄 (10137)


分享

其實,好多香港人不知不覺都變到好似齊蔭老母咁,「刻毒、無知、冷血、涼薄」。

我有留意開一些國X空姐、XX SECRETS之類嘅PAGE,所以都知道我地香港呢間蜚聲國際嘅航空公司對前線人員係幾咁仆街。人地空姐嘅收入來源只係靠飛行時數嘅錢同埋外站津貼,人工本身已經唔高啦,佢仲要兩邊都減。飛十幾個鐘,做十幾廿個鐘野,去到美加歐洲已經累到仆咗係度,連休息時間都要減,人地連時差都未適應到,訓醒覺又準備飛返香港……

好啦,最後間公司真係衰格都畀人擺上新聞啦,公司對前線員工刻薄得好恐怖。但比呢單新聞更刻薄更恐佈嘅,係香港人在新聞下低嘅留言,佢地嘅想法睇到我好心寒。

「又要鬧又要留, 咁唔滿意可以辭職囉!」

我想問下,有冇人返咁耐工,係未鬧過公司一句架?

公司減你人工,你係唔係笑住多謝公司皇恩浩蕩,仲三跪九叩謝主隆恩?

你原本一星期五日工作,公司叫你一星期改為返六天,人工再減多二千,你係唔係一句怨言都冇,仲係欣然接受?

咦?唔係?咁點解你又要鬧又要留?咁唔滿意你咪辭職囉。

乜原來員工唔可以為自己爭取自己原有嘅工作條件架咩?佢地已經唔係嘈話要加津貼加人工,只係想公司唔好減人工減津貼姐,咁都唔可以出聲?香港人嘅奴性係咪去到世界嘅尖端啦?

「嘩,有24個鐘休息重唔夠?航空條例是13個鐘而已。停留短咗,即是返工日數少咗,當然津貼便會減少。」

做乘客,要你在飛機坐17個鐘去美加,乜都唔洗做,淨係食同訓,你落到飛機都係累到hihi。更何況空服員做一班17個鐘美加機,計埋飛前飛後嘅ground duty,差唔多20個鐘工作。去到當地,時差仲要同香港相距12個鐘,累到任何時間都會訓得著,訓到好似昏迷咁,仲未調理好生理時鐘,24個鐘後被捉返香港,仲要再工作多20個鐘返香港。外站逗留時間短咗,津貼又減多一半。

你返office,原本一星期返6日,一日返8個鐘,一星期返48小時。Boss叫你改為一星期返3日工,一日返16個鐘,一星期都係有48個鐘,人工呀就減多三千啦。嘩你就正啦,你返工日數又少咗啦。(係唔係又要謝主隆恩?)

「叫呢班空中服務員將的人工、福利和工時去同其它航空公司比較,睇下佢地要唔要轉工」

咦,你份工一個月HKD8000,一星期返五天,公司想減你HKD1000。

嗱!你唔好嘈呀!同一份工,非洲嗰邊,人地係逗緊HKD1500一個月,一星期返六日呀!

你人工、福利和工時都已經比其他公司好,我睇你仲嘈唔嘈。

同其他航空公司比較?

係喎,中東嗰D航空公司多數都係只畀空姐在外站留24個鐘休息。唔洗望啦,係我呀!所以我更加想講,你知唔知我每次做完一些美加機、澳洲機(全部飛行時間係十幾個鐘),休息24小時再飛回沙漠,真係累到就快暴斃。我試過一個月做2班咁樣嘅美國機,做到情緒出現咗問題,要過咗好一段時間先好返。

但人地航空公司會提供員工住宿,包水電煤,日日有專車車你返工放工,醫療福利又好D,人工都好些少。

所以你冇得咁黎同其他公司比較,實有公司好過佢,亦有公司差過佢,不過係睇邊一方面。但如果人地只係爭取公司原有嘅工作休息時間、薪金水平,乜真係有問題咩?

「時薪159元,這樣的筍工去那兒找 ?」

空服員呢份工唔似得工職,唔可以亦都唔合法一個星期飛48個鐘,一個月飛200個鐘,咁樣飛中幅射都中到死。佢地一個飛月大約飛70個鐘,HKD159時薪(仲要係飛咗三年先有呢個價),一個月只係HKD11130,咁原來已經算係筍工?仲有,飛前飛後嘅ground duty都係工作之一,所以真正嘅工作時數,唔係只係70小時。

其實,人地wear爛塊面揭開工作辛酸、公司對自己有幾刻薄畀大家知道,只係希望大家香港人都會支持,向無良僱主施壓。但最後睇到個人好失望嘅係,自己香港人反而唔係支持自己香港勞工,反過黎幫間仆街公司鬧返班前線人員,支持無良僱主欺壓員工,你不如話返畀我知,自己係唔係已經擁有齊蔭老母嘅影子──刻毒、冷血、涼薄。

(利申:我唔係刻意幫住cx前線人講說話,只係睇到某部份香港人嘅刻薄留言而忍唔住出聲)

原文載於作者FB,標題為編輯所擬



原文連結