2015-04-09

【輔仁媒體】姐死姐還在:有關「我地呢代」(呢篇文係長過長城架… ) (2636)

(photo via cc Flickr user Robert S. Donovan)

(photo via cc Flickr user Robert S. Donovan)

尋晚睇左 CUHK Secrets 一個 post (請見link),講一個80 後嘅中大師姐,SARS 年畢業,十年以來嘅遭遇。

佢十年來,最大嘅不幸我歸納如下:
1. 屋企環境唔好:入大學借 loan,畢業要負擔屋企
2. 大學時冇時間砌 CV:冇 exchange,冇上莊,搵工好輸蝕
3. 畢業唔著時:SARS 畢業得 6000 蚊人工,轉工又俾人瘋狂壓價
4. 公司壓榨:冇升職有 OT,加人工好似「施捨個發財錢」咁少
5. 儲極都唔夠錢:要買樓,結婚,進修,生仔

睇完之後,我感受良多:

一. 只有「我地呢代」先明「我地呢代」

–> 「我地呢代」係睇住香港家道中落,我地愈大,香港愈折墮,細個憧憬「香港好好搵食」唔存在,個種失望D 老屎忽唔會明。

–>上一代用「舊屎好好景,努力有飯食」theory,瘋狂批判「我地呢代」。大佬,你個代係「康雍乾盛世」,「我地呢代」一畢業就「八國聯軍晚清」,點相提並論?每星期個D職場慧眼,好似天氣報告咁,講我地八九十後唔上進。「我地呢代」已經活喺「晚清」,每星期踩我地兩腳,老屎忽有咩得益呢?

二. 我真係一個幸運嘅窮撚

雖然我都係資深窮撚,大學畢業都係人工少冇前途買樓冇望,面向仆街政府,但我比起呢個師姐幸運好多,我「有得揀」。

–> 我同呢個師姐一樣,我係住深水埗嘅資深窮撚。記得小學老師開學話:「申請書簿津貼同車船津貼嘅同學,出來排隊攞表格」,結果幾乎所有同學都出去排隊,只有幾個同學坐喺度,老師都始料不及,叫我地返埋位,人人派一張。

–> 大學時期,我想上嘅莊,想做嘅迪迪尼暑期工,想去嘅exchange,想申請嘅海外intern,我都好似打街霸咁KO 哂。

–> 由於我有個年紀比較大嘅家姐(佢應該想斬我架啦),我大學冇借loan。又由於我呀爸呀媽人生好 chur,我畢業時佢地啱啱供完層樓。我好似 M 巾廣告所形容咁 carefree,唔算有太大家庭負擔。

喺「有得揀」嘅情況下,我 FINAL YEAR 做左個「忽忽地」嘅決定…

–> 我讀嘅係教育學士,但我決定唔教書。FINAL YEAR 最後一個semester ,faculty 個 professor 開左個 seminar 教我地搵教席,我見個PowerPoint 上屆畢業生個就業 pie chart,最大個忽係教師,仲有兩條 gap 喺個 pie chart 度,分別係 master 同 others。

–> 我畢業個年係 334 學制交接期,有額外教席,4月頭中大photo day ,影影下畢業相,我D 大學同學已經收到電話,幾個同學都有多過一間學校請。

–> 眼見人人都有著落,我一封搵教席嘅信都冇寄。我呢個忽忽地嘅細路,讀完4年,做完實習老師,我寄信去「少老師人工一倍有多」嘅報社考記者。

–> 我唔係想講,我真係好看破紅塵,好清高唔貪老師人工高,而係我真係好好彩,因為我冇咩屋企負擔,可以跟隨我「忽忽地」嘅意願。你可能話,你「根本岸久」,唔想做老師就 JUPAS 諗清楚啦。我承認我 Form 7 個時係「睇餸食飯」揀科,我想提出嘅係,香港地有幾多個我咁好彩,屋企畀我咁大容讓,畢業後唔理人工重新揀工?

–> 你又可能話,「唔鐘意都冇理由讀左唔做老師啦,少一倍人工,唔用腦又以為好有個性」。社會人士永遠覺得你畢業搵愈多錢愈叻,畢業後見工都俾人問:「讀左4年點解唔教書?我地畀唔到教師一半人工你架」

–> 冇錯,我而家都係俾大公司搾乾我,但我深明「條路自己揀,仆街唔好喊」嘅道理。我從來冇覺得「做唔做老師」係對與錯嘅選擇。我只係覺得有得選擇,而我心甘情願地為自己揀,係我最大嘅幸運。

點解我寫呢篇野?

我好希望上一代唔好再用「以前我奶奶對我唔好,而家我做奶奶,我唔會畀好日子你過」嘅態度,去批判同壓抑「我地呢代」,你需知道,你踩我地兩腳,你係冇著數嘅。何不發揮慈悲為懷嘅精神,出少句聲當幫忙呢。

我想特別同搵緊工嘅U grad講,我知家庭環境各有不同,搵工必定有考慮「上繳家庭,改善屋企環境」呢個因素,但如果家庭環境許可,就盡量行使「有得揀」嘅機會,搵份你會感到開心嘅工吧。

PS. 有人狂插 CU secrets 個師姐,話佢得個呻字。人地身不由己,處於困窘,冇得揀,已經喺 CU secrets 度呻,話明 secrets 啦,點解仲要插人呢?要插就插準政權,質問政府點解令香港咁不堪。

再PS. 我做記者時間唔多,我原本想做副刊專題,最後入左國際版,仲入左死人組。死人組會預測定邊個名人死,準備好佢生平,佢一死就填返個死亡時間上去。而當年我見到個條「死人list」頭幾位有日皇,佢而家都未死,所以話,好多野「真係估你唔到」,人人際遇都唔同,點解要插到D 年青人咁金呢?



原文連結