2015-04-06

【輔仁媒體】賴叔:公民提名?《基本法》初稿咪有囉! (718)

螢幕快照 2015-04-05 下午11.32.34

2015 年 4 月 4 日,兒童節。受難節之後,清明節及復活節之前。特首梁振英出席「《基本法》頒布25周年研討會」,細數《基本法》起草嘅前塵往事。由 1988 年 4 月 26 日發布「《基本法》(草案)徵求意見稿」 (簡單講就係《基本法》第一稿,請留意第 45 至 47 頁) ,到 1990 年 4 月 4 日喺全國人大通過及頒布《基本法》,到之後回歸、落實執行《基本法》,當然唔少得對今時今日政改僵局抽抽水。

本來呢啲畀中共同保皇黨圍爐取暖交交際嘅嘢就冇咩好講,但唔知點解,梁振英今日 (4 月 5 日)急急腳出咗篇聲明,反駁前《基本法》草委李柱銘指「《基本法》第一稿有公民提名」嘅講法。更奇怪嘅係,篇聲明出咗四個鐘又要修改,刪走咗「其他三個非普選方案也沒有公民提名」。

賴叔的起心肝去搵史料(呢度要多謝《立場新聞》提供《基本法》第一稿嘅 PDF hyperlink ,大家翻去第 46 頁附件一,簡單講係選特首嘅方法)、望清楚第三個方案第三點。篩走啲廢話,概括啲講就係「得到 50 名香港永久性居民提名的人,均可成為特首候選人」。雖然呢個方案係由功能選舉團選出特首,但提名方式又的確係有「公民提名」。

換句話講,《基本法》起草嘅初衷的確係有「公民提名」,只不過最終冇寫入《基本法》。

點解呢啲咬文嚼字嘅嘢要特登拎嚟講?好簡單。特區政府由上至下一直反對公民提名,都係攞「公民提名不符合《基本法》」作為藉口。政府一直喺公共宣傳片入面對大眾灌輸嘅,就係「一切源於《基本法》」、「普選都要按《基本法》規定實行」,梁振英甚至玩大到「符合《基本法》就係真普選」。如果《基本法》根本上排斥公民提名,市民要求背棄《基本法》,就係挑戰一國兩制嘅基礎……之類啦。

好咧,而家唔知邊個豬頭幫梁特首喺大庭廣眾面前講錯嘢,話起草《基本法》嘅時候冇方案要求「公民提名」,亦喺引述《基本法》第一稿五個建議選特首嘅方案時,遺漏咗第三個方案「得到 50 名香港永久性居民提名的人,均可成為特首候選人」慌死你哋睇唔到,要特登粗體紅字寫多次)。

事實證明,《基本法》喺孕育嘅階段係有「公民提名」嘅元素,而家《基本法》條文亦冇講明選特首嘅時候唔准有「公民提名」。既然「公民提名」冇「違反《基本法》」,咁政府一路以嚟嘅 Line to Take ,就根本站不住腳。咁當然,陰謀論啲講,如果政府喺政改方案表決前蝦碌將一切推倒重來然後 2017 年繼續 1,200 人選特首,邊個最開心就大家心中有數。但既然而家政府嘅講法出現漏洞,「飛雲機會嚟喇」,仲唔食住上執住呢一點嚟追打政府,唔通等要重陽搵山拜?

(以下係畀懶但有心睇返梁振英兒童節嗰日講啲乜嘅人睇嘅……)

附註:節錄香港政府新聞網 – 政府評論《特首:按《基本法》辦事

另一個例子是行政長官選舉。《中英聯合聲明》關於行政長官產生的規定是:行政長官在當地通過選舉或協商產生,由中央人民政府任命。在《基本法》起草 初期,由於有關行政長官產生辦法的方案眾多,在草擬過程中未有一致意見,徵求意見稿有關的附件,亦即是《香港特別行政區行政長官的產生辦法》臚列了五個主 要方案,徵求香港各界各階層意見。

方案一,主張由選舉團互選20人組成提名委員會,提名三名候選人,然後經由選舉團全體成員選舉產生。選舉團共600人,由立法會議的成員、各區域組織的代表、各法定團體和永久性非法定團體的代表、各類功能界別的代表組成。

方案二,主張由不少於十分之一立法會議成員提名,全港一人一票直接選舉產生行政長官。

方案三,主張由功能團體選舉產生行政長官。功能選舉團不超過600人,其中工商金融團體佔25%,專業團體佔35%,勞工團體佔10%,宗教、社會慈善機構佔15%,街坊組織、小販團體佔15%。

方案四,主張首三屆行政長官由顧問團協商產 生,報中央任命;以後由顧問團提名三名候選人經中央同意後,交由選舉團產生。選舉團50人至100人,由香港各界人士提名,行政會議甄選,再由行政長官提 請中央批准後任命。選舉團由退休行政會議、立法會議成員、行政長官和曾經由中央任命的主要官員組成,人數最少250人,最多500人。

方案五,主張由提名委員會經協商或協商後投票程序提名三人,全港一人一票普選產生。

五個方案當中,兩個是普選行政長官的方案,但兩個普選方案都沒有「公民提名」,更沒有方案要求「公民提名」,沒有人說沒有「公民提名」的普選,就不是真普選,更沒有人提出甚麼「國際標準」。



原文連結