2015-08-15

【輔仁媒體】熱豆腐仔:人愈大,愈容易習慣孤單 (6739)

昔日既朋友圈子,隨住時光流逝
曾經紀念冊上既約定
其實你..還記得嗎?

人愈大,社交圈子雖然擴闊左
但有同時有無發覺..彼此之間卻變得愈來愈疏離

每年接近九月份開學既日子,對於一班剛放榜既中學生,實在存有悲喜交集既心情
大家都明白到當日既中學戰友要各散東西,各奔前程

但大家同樣知道,係新既校園入面,大家自然會建立一個新朋友圈子,
時間亦會自然分配比大學既朋友們

舊日既中學同學,再見面亦變得困難

當然有人話
離開,要為了再聚。

雖然好多人都咁講,但能夠經常再聚既,又有幾多個會做到?
或者偶爾大家都會係Wtsapp group 講下野,但始終時間太難遷就,最後聚會亦變左無了期壓後

或者你覺得時間既野,大家幫幫手擠一擠就有
但你最後都會發覺,原來人比時間更加難遷就

即使成功重聚,都已經好可能係半年一次,甚至更長時間

然而,踏入社會做野,情況更加明顯,更加惡劣

話說前晚自己一個人去左運動埸跑步
「我琴晚都去左跑步呀」

「搞錯呀,又自私做」

閒談下,其中一個朋友知我去左跑步

不知何月何日,香港市面上又多個「潮語」
自私乜,自私乜

無論睇戲

「呢套戲我睇左啦」

「又唔叫埋,自私睇」

定係食飯

「今晚?今晚唔食啦,已經食左啦」

「又自私食」

的確,以往中學既時候,剛才提到既事好多時大家都會約埋一齊做
其實我地每一個都想一大班朋友共聚,都希望熱熱鬧鬧
但無奈地,只係時間上並唔容許我地咁做

我約得你黎,又要就時間就地方
等得你回覆,我已經完成左件事

如果大家仲係求學階段,或者仲未體會到當中既困難
尤其係中學時期,大家每日返學朝見晚見,加上並無太多野纏身
一句說話就可以隨時落街,要約埋一齊出黎絕對唔係困難事

但無奈踏入社會,好多野都不知不覺咁變左
驀然回首,先發覺一切已經唔同晒

我記得中學個陣,每次無論出街定係食飯,時無大小都要朋友陪
要我自己一個行街食飯,係絕對無可能既事
個陣見到D人自己一個坐係餐廳食飯,都覺得佢地好慘..好孤獨

時隔幾年,估唔到我已經成為佢地既一份子..

但並唔係我鍾意一個人食,只係無奈地接受,無奈地習慣
有時放工,想搵一個岩時間而佢又未食野既朋友,係相當之難

就算真係有朋友捱義氣,但始終時間太少,有時等得黎都寧願自己快快手食完,返屋企休息仲好

大家都已經投入工作,投入另一個圈子
再約埋一齊已經變得困難

好似隨便係Group一問
「食唔食飯呀今晚?」

「唔得呀!要OT呀」
「下次先啦,我約左大學班朋友」
「唔得呀,我好耐無返屋企食啦,今日應承左呀媽」

有D人,直頭應都不唔應,消失左一樣
但最諷刺係,明明藍剔左

「已讀不回」,或者真係令人更加傷心

唔好話約去旅行,就連一餐都咁難既時候,有時真係寧願自己一個搞掂算

唔知咩時候開始,我已經覺得一個人食飯係完全無問題
甚至開始,我會一個人行街..一個人買野

人愈大,圈子雖然擴闊左
但發覺彼此之間卻愈來愈疏離
或者大家真係太忙,要有共同既時間,已經變成一件奢侈既事

由中學到大學,大學出到社會
隨住自己成長,好多時都只能靠自己

我並唔係愛上左孤單,只係環境迫我慢慢習慣自己一個
既然有時改變唔到,或者,就要迫自己學識習慣同接受

時間,令人慢慢變得獨立,好多時變得不再需要依賴其他人
又或者,孤單同獨立,只係一線之差

以上既事不斷來來回回重覆上演
原來無聲無色間,自己已經習慣一切…



原文連結