2015-08-22

【輔仁媒體】熱豆腐仔:點解約個旅行都咁難? (10955)

唔知大家有無經驗,約自己朋友去旅行,真係死好多細胞

「大家去唔去旅行呀?」

「幾時呀?」

「去邊先?」

「有邊個呀?」

「用幾錢先?」

去旅行,其實都係由「時地人錢」四個因素主導

「都係亞洲地區啦,台灣、日本、泰國、韓國個D都可以,短短地玩五日,我諗都係$5000-7000姐,如果有抽到機票仲平D添。我手頭上都有幾日大假,連埋星期六日隨時都得架啦,可以大家再傾下」

「睇下點啦」

「唔知架,可能都可以既」

「哇咁貴,邊有錢呀」

甚至已讀不回..送你藍剔一個

原來答晒所有問題,最後都係回到起點
旅行四大要素,原來我忽略左最重要一環.. 係「人」

旅行既意義,每一個人都未必相同

有人鍾意一種浪漫,
「同鍾意既人一齊,去邊都無所謂」

有人鍾意一種熱鬧,
「同一大班朋友一齊,先係最盡興」

有人鍾意一種溫馨,
「同屋企人一齊,家庭樂先最放鬆」

但無論屬於邊一種,同伴的確擔當住旅行最主要既考慮因素
所以當你心血來潮想去旅行,熟識既朋友當然係首選

但可惜既係最重要既因素,偏偏亦係最難解決既問題
關鍵在於「人」

自從大家都踏入社會,朝九晚六,再無暑假Sem break
旅行,好似變得更加難約..

或者就以一般打工仔為例
假若你一年有十二日大假,月入萬四蚊
如果連埋星期六日一齊,只需要請三日大假就可以即刻起行

萬四蚊雖然並唔係高收入,扣除家用同日常開支,如果有心既話,一個月儲蓄4000蚊係絕對可行

當然你話無左呢4000蚊會連兩餐都成問題既,全家人又等你筆錢開飯,咁當我無講過啦..

畢竟,生命係重要過玩樂既..

但假若4000蚊你可以做到,可能只需要儲蓄兩三個月既時間,
基本上已經有足夠既金額應付短線旅遊

或者歐遊實在太貴,而且時間比較長
根據「時地人錢」既考慮因素,已經令好多人自動打消念頭
所以,短線亞洲地區成為左大部份港人既首選,包括身邊既朋友

既然講到咁容易,假期又有,旅費又有,地方又係亞洲短線地區,咁仲等咩呀?
驀然回首,人呢?

原來呢樣係最重要,亦都係最難磨合既一個因素

大家都係打工仔,同樣既假期,同樣既人工,同樣既地方
點解人地可以一年去三次,你就一年都去唔到一次呢?

當班朋友個個都話想去旅行,但原來都係得個「講」字
每個人都懶懶閒,遲遲都唔肯一齊計劃一下

直至你費盡唇舌,花盡心機
旅行計劃總算有點眉目

但遺憾既係,到真係有少少共識,好快又會有人放架飛機出黎

「我都係唔得呀,公司好多野做」

「呢排洗大左,唔夠錢呀..」

每一個所謂原因,其實都係一個「走數」既藉口
有D甚至離譜到

「去泰國?泰國好危險架..之前又話搶遊客野..語言又不通..」

當一個人想逃避既時候..原來真係咩都講得出

咁你真係小心出街,香港人多車多,都可以好危險架

講到尾,其實係睇下有無心去做決定

所以,有時真係好羨慕讀書時期既畢業旅行

雖然大家旅費並唔多,或者好多人更加要問屋企人借
但個陣勝在大家都夠熱血,個個都未出發先興奮
淨係Plan行程大家已經手舞足蹈,跳晒開心舞

但反而踏入左社會,呢種熱血,對旅行既熱衷好似慢慢消失緊
係大家關係疏離左,定係大家已經變左?

或者呢個年紀,大家都變得只懂向錢看,就連大假都換成腥臭既金錢
即使我地搵到錢,有大假,但卻搵唔到同伴..

傾左十年,講左十世,原來最後都係去唔到..
既然又要考慮同伴感受,又怕大家唔岩玩,又怕會有爭執

所以有人可能已經看破紅塵,唔再考慮「人」既因素,
自己一個去旅行算L數

或者人大左,考慮既野唔可以好似之前咁,咩都無所謂,咩都做左先算

人地話,去一個旅行就知道佢係咪你既兄弟知己

的確
最後我發現,原來要搵一個可以陪你癲、陪你玩、陪你去旅行既朋友,真係好難..

如果你身邊仲有呢班熱血戰友,千其唔好咁輕易放過佢地..
捉晒佢地一齊去玩、去旅行啦!!



原文連結