2015-09-14

【輔仁媒體】薰華:金象米唔寫泰國?唔使驚…… (1278)

今晚,注意到網上有此消息……

QOOAH 截圖

QOOAH 截圖

有人驚金象換咗中國米,不過呢,要驚嘅係金象,而唔係香港人。

點解呢?是咁的,因為唔係中國米囉。

我哋可以睇下工業貿易署嘅統計數字:

螢幕快照 2015-09-14 上午3.46.19

自從2002年以來,香港進口中國米嘅比例最高果年係2010年,原因係2008年起泰國水災令農作物失收,泰國米進口量下跌,同時未有其他地區嘅食米補充到市場,咁先令中國米進口量多咗。其後自2011年起越南米入口量暴升,中國米進口比例都一路下跌,今年上半年只係佔6.4%,遠低於泰米嘅58.7%同越米嘅29.6%。

可以話,香港食米市場一直都係東南亞米嘅天下。

事實上,中國米喺香港,可以話係一直冇市場。如果去過中國旅行,只要過咗五嶺,離開咗廣東,食親嘅飯都係非常粘嘅米種,同我哋香港人食開一粒粒嘅絲苗米同香米完全唔同。可以話中國米喺香港根本就冇市場。

當然,中國係唔係種唔出絲苗呢?唔係。香港都可以種得出絲苗啦,問題係,中國自己都唔夠食!而且,就近嘅廣東,其實自明清起就已經唔夠米食,因為廣東商業發達,好多耕地都改種經濟作物。清朝雍正年間,亦都明令廣東可以向暹羅(即係泰國)買米,呢個亦都係香港人食泰國米為主嘅原因。亦因為咁,中國賣畀香港嘅米本身就唔會多。喺香港好少無啦啦要食東北大米。

再睇多個圖表:

螢幕快照 2015-09-14 上午3.46.06

原來,2015年中國根本就冇賣過任何絲苗米嚟香港,而且並唔係因為上半年無米可賣,因為2014年之前中國一直都可以賣到絲苗米嚟香港,此外,中國亦都唔會賣香米嚟香港。同時,呢個表亦都說明咗點解越南米自2010年起就可以喺香港食米市場佔一席位。

所以呢,大家首先唔使驚喺香港買米買到中國米(當然你自己係要揀中國米買冇人阻到你),就算係買冇標泰國嘅金象米,頂多都係食到越南米。要驚嘅,只係金象牌,唔知今次有冇公關災難睇呢……?

統計資料來源:工業貿易署網頁



原文連結