2015-12-29

【輔仁媒體】藍橘子:「究竟要幾大原力先可以停住激光呢?」 (5989)

前幾日趁住聖誕節假期,就梗係去睇《StarWars》啦。其實真係要多謝呢套經典電影,無佢我都唔會再有機會同老豆兩仔爺去戲院睇戲,仲記得睇第一集時我都未出世,係到中學我先煲返晒咁多集。

平時我同老豆都無乜兩句,雖然佢鍾意睇戲,但我介紹佢睇啲新戲佢又唔啱睇,話《復仇者》睇到頭都暈埋,我聽嘅歌佢又唔啱聽,我介紹佢睇漫畫好似《銀魂》啊《一拳超人》,佢話《老夫子》先係呢個世界上最好笑嘅漫畫。

所以話《StarWars》可以話係我哋兩仔爺唯一共同話題。

不過…戲入面舊角色都成頭白髮啦,我老豆都已經係老人家一名,佢記性差,人物關係溝到亂晒,又將其他舊戲混埋入去,佢問我個公主點解巢晒皮…我話你頭髮都甩晒啦!痴線。

睇完套戲,梗係即刻瘋狂討論劇情啦,當我問佢:「究竟要幾大原力先可以停住激光呢?」

點知我老豆神情凝重咁答我:「只要停到羅文…就可以停到激光。」

「你講乜春羅文啊?羅文都無份做…」

點知,我老豆就喺戲院門口好大聲咁講:「羅文可以喺激光中穿梭,再用千支歌,將你迷鎖啊衰仔!」

我老豆係羅文Fans,喺屋企已經成日煲佢啲歌,可能我頭先講句嘢冒犯咗佢偶像佢先發咁大脾氣。但佢突然間咁大聲講聲,搞到戲院全部人都望晒過黎,鬼死咁尷尬,我咪拉佢走囉,行到半路,佢又突然捉住我隻手問我:「邊個係曦?」

「Hay?你係咪講個靚女啊?佢叫Rey啊老豆。」

「唔係…只有阿曦,先可以打敗Dark side…」

「頭先邊有角色叫Hay啫!」

呢個時候,老豆又好興奮咁大叫:「你再也沒法擋!Hey!」

我諗佢真係聽羅文聽到上晒腦…



原文連結