2015-12-31

【輔仁媒體】雞蛋兄弟:呀Rey 係觀音級女神 (1515)

REY STAR WARS

同幾位友人睇完星戰,一完場朋友們顯得相當興奮,

又估到底黑人死得未,

又話好多謎團未解開,枝激光劍又唔知邊度來。

三個人團團轉係咁問我意見,叫我預測星戰下集講咩,

我大叫一句「咪嘈啦!」,然後就行開左。

聖誕節要同一班男人睇戲本來就係一種錯的決定,

而完場仲去討論咩Skywalker、咩黑勢力、咩第一軍團,簡直喺錯之又錯。

成套戲重點喺咩呀?係呀REY 呀嘛。

我知呢個世代有好多女神,百年一遇、童顏魔女乜乜乜

但係呀REY唔同,佢根本係清泉,如果以佢咁嘅條件放喺香港,

我敢擔保,屬於觀音級。

REY STAR WARS

點解?首先,佢識砌機。一個識砌機的女仔代表佢明白男人嘅心。聖誕節會用幾千蚊買張GTX970卡做生日禮物俾你,而唔係一張貼住佢張相既垃圾出聲聖誕卡。當你去買GAME嘅時候,佢會提你屋企部機喺行唔到Witcher 3 Ultra Quality ,而唔係話「咩來架?又駛錢買遊戲」。佢會識分I5同I7,而唔係剩係識iPhone同iPad,除左自拍粒制同Instagram就咩都唔識。你話搵到個陪你捱M記的女人好幸福,SORRY,陪你打機既女人先係極品呀。

第二,佢係孤兒出身。孤兒有咩好呀?就係好需要愛。你睇下FINN 個柒頭,無樣無錢無父幹無才能佢都嗒糖,俾著才智兼備既我行埋去,FINN 真係一刀被Kylo Ren斬死都無人可憐。然後,你再睇下HAN SOLO,七十幾歲帶住隻臭猩猩都夠薑搵呀REY 做佢契女,然後呀REY仲要唔敢SAY NO。呢種女人真係先到先得,後悔都來唔切。

REY STAR WARS

第三,佢夠財政獨立。你諗下一個自細執零件賣嘅女仔,對住成班麻甩佬都可以自力更新,佢點會係果種依賴男人嘅人?比起話男人無上進心,佢兩三下散手就整好你部機,都幾肯定係IT界嘅一粒明日之星。你諗下LED聖誕樹都收六位數字喎,呢個時勢娶到佢真係打跛腳都唔洗憂。諗深一層,父母雙亡禮金唔洗你俾;住廢墟樓又唔洗你買;做得再絕啲,粒鑽戒,求其搵舊六角螺絲批兩野就得,你話唔想咁都覺得自己虛偽啦!

第四,佢真係靚。我知靚有好多種,但有一種係公認嘅,就係素顏美。

無僭健無添加無瀘鏡都出得鏡嘅,差極都有個譜。你睇下呀REY,輪廓分明得來又唔刻意,化妝得來又唔浮誇,同果種剩係知韓國邊隻唇膏最紅,日本邊隻粉底最白嘅女仔根本唔係同一個運動場。你幾時見過小龍女係古墓化妝嘅姐?無呀嘛,有果個都係陳妍希來架啦!

第五,佢夠青春。人地19歲喳,女人最佳年齡,仲需要講咩姐?

REY STAR WARS

所以我話,班毒男睇戲都唔知睇咩,兩個字:「膚淺!」



原文連結