2016-03-18

【輔仁媒體】君萃:己所不欲勿施於人,屙濕廁板可唔可以抹返呀? (1983)

(photo via cc Flickr user Morgan)

(photo via cc Flickr user Morgan)

返香港有一樣嘢真係唔鐘意嘅係,(其實就唔止一樣)德國同香港女廁個衛生程度真係差好遠。男人可能唔知啦,但係好多香港女仔成日要懶係乾淨,但係唔知點解佢地用完嘅女廁個情況可以咁惡劣。

當好多德國人話柏林真係好污糟嘅時候,我真係笑而不語,如果呢啲德國人去過香港啲女廁就唔會咁講。喺柏林,就算係土佬開嘅餐廳,個廁所都係一定乾淨:個地下係乾嘅,廁板上面無尿,(當然唔會有鞋印啦!),無異味,個垃圾筒唔會滿溢。有啲貼心啲嘅餐廳(多數係女人打理嘅餐廳),廁格入面有時仲會有綿條同衛生巾,所以每次去廁所都係一個幾舒服嘅experience。就算係好差嘅情況,即係學校mass party,個地下係濕嘅,成班醉貓去廁所,個個出返嚟,個廁板都係出奇地唔會有尿。

反觀喺香港,就算一個正常嘅商場廁格,除非你去正好似IFC呢啲會有個清潔阿姐瘋狂洗廁所嘅商場,否則去親嘅廁所大多時都好似比人輪姦咁。垃圾筒比廁紙同M巾塞到爆哂咁都算,我最接受唔到嘅係廁板上面有尿!係,屌,我當然可以用無影凳咁去廁所,雖然都有二十幾年嘅如廁經驗(LOL),但都係會有失手嘅時候:就係如果唔抹啲話,有時大腿都係會掂到啲尿,(人唔夠高係咁)所以每次去廁所,都要抹乾淨啲上手尿加無影凳去廁所(頂,我唔明點解去個廁所都要講到去寵物小精靈道館咁有攻略)

如果我個人喺銅鑼灣,我就會去時代去廁所,因為佢有消毒劑之餘,仲有墊廁板專用紙,真係消毒抹完之後再墊多層紙去就去得特別舒服~

但記得有一次去文化中心聽完concert,見到廁板上有尿,心諗:算啦屌,抹一抹走哂佢之後就無影凳去屙咗佢就算。我就光速扯咗啲紙巾出嚟,疊起,抹走佢。點知,屌,仆街,我掂到啲尿呀!屌!屌!屌!(好難頂所以要屌三次)。之後我就喺個廁格度苦思:到底我應該出去洗個手再返入去屙尿之後再洗過手。當時出面有人等緊,如果出咗去個廁格就會被視為放棄廁格;所以定係就咁去就算-用一隻沾染過人地嘅尿嘅手抹屎忽就算數----苦思咗三秒之後,我都係唔想出去,但我又唔想我下面掂到人地嘅尿。所以,我就拎出我寶貴嘅資源-濕紙巾!(好彩平時有儲開)徹底抹手再光速去埋個廁所,再係咁用皂液狂捽咗好耐先出去…嗰日心情本身已經唔好,仲要去廁所隻手掂到尿,頂~

其實去完個廁所,如果屙濕咗,抹返個廁所其實有咩咁麻煩?你去污糟咗自己屋企個廁所都會抹返乾淨啦!點解唔可以將心比己,將呢個習慣用喺公共地方,而反正你去完廁所抹返乾淨之後都係會洗手架啦(I suppose,希望係),點解香港嘅女士們唔可以抹返乾淨先出返個廁所?

雖然你大可以反駁,抹咗其實啲細菌都係會stay喺塊廁板上面-但呢個已經唔單只係細唔細菌嘅問題,而係我覺得去廁所因為我腳唔夠長,而做唔到一張夠高嘅無影凳,而意外地掂到上手啲尿嘅感覺真-係-好-撚-嘔-心-囉!我理得你點解會屙濕,點解唔抹返乾淨佢呀!!!????



原文連結