2016-03-11

【輔仁媒體】Uenmanman:一定要看——地鐵車廂座位上的驚人真相!(太噁心了) (3430)

有無見過,火車上:左一排玩緊Candy Crush嘅大媽,右一排胳肋底夾住頭條日報嘅大叔(職業、外型、年齡唔重要,總之就係Candy Crush同頭條日報)。四邊透明玻璃各一年青人或情侶,中間企一個白髮老人。

當大家討論緊年青人讓座係咪必須時,我想講唔讓座個班根本就唔係年青人。俾人批鬥咁耐,家陣好多年青人行入車廂見到有位都未必會坐。就算坐咗,見到有老人家大肚婆行入黎,唔識同全車廣播一句:「等我讓座俾呢位婆婆先~」嘅,都會默默自己彈起身。最激氣係有時老人家好客氣、唔認老、「下站落車唔洗啦」時,旁邊一直虎視眈眈嘅Candy Crush大媽同頭條大叔就會一個箭步攝個屁股落黎,再露出一副人棄我取之嘛「你唔怪得我」嘅表情。無腰骨嘅年青人唯有谷住條氣埃住塊玻璃塞住對耳(廢事聽到Candy Crush啲Bling Bling聲)由九龍塘企到去大學站。

Candy Crush大媽同頭條大叔係咩人?咪就係個班教育程度高過上一代少少,生活經驗多過下一代少少,處於現今社會金字搭啄啄,自己夠食仲養得起你呀吹咩嘅群體囉。與此同時,佢地亦都係第一代香港土生土長嘅真正「本土派」,係香港經濟起飛時期順勢乘風破浪,剛剛好成為咗「獅子山下」精神下嘅驕人代表,現正坐穩各大辦公室榮譽老屎忽之位,差在未出書講自己成功奮鬥史嘅人。

好多時候,佢地都係無敵嘅。任何問題,對住社會經驗豐富過佢嘅人可以講:「你都無讀過書你識乜呀。」;對住讀書讀得多過佢嘅人又可以講:「你仲細出黎社會就知咩事。」對住個仔,前一秒佢地教:「仔,要不平則鳴見義勇為呀。」;下一秒:「有書唔讀日日出黎搞亂社會。」面對永遠立於不敗之地嘅理論,年青嘅你,只可以起立拍手掌:「嗯,世事都被你看透了。」

但係,你咪以為佢地咁堅信自己三十年前成功上岸個套,就等於佢地拒絕接受新思維新方法呀。唔信嘅話,你試下老吹一篇[一定要看—地鐵車廂座位上的驚人真相!(太噁心了)],之後whatsapp俾你老媽子。詳細內容唔重要,主要元素「有位朋友試過」+「英國大學醫科教授話」+「美國大學實驗證明」,最尾加句:「看完後,請不要吝嗇,分享給你的親友,讓他們都知道吧!」咁就得咖啦。

咁樣嘅話,下個星期翻學,你就會見到原先左邊個排嘅Candy Crush大媽同右邊個排頭條大叔死都唔肯坐,而係走過黎同你爭個塊玻璃。



原文連結