2016-04-24

【輔仁媒體】電腦大爆炸:那動人上水,不用常回看 (4360)

我一出世就住係上水,中小學都係上水讀,我以前好鍾意上水,阿叔細細個就蒲開名都個間冒險樂園,得閒又去下馬會道個間租碟舖。個時住係上水,我從來唔會覺得悶。

對我黎講,係上水最開心的回憶應該係中學食Lunch。我同我個兩個最好的老死,最鍾意去新都個間元綠壽司,由佢係樓上食到佢搬落樓下,最後食到佢執埋。個時,學生餐最平22蚊搞掂,大大碗包埋野飲,我仲記得佢每個星期餐牌都唔同,但係總會有吉列豬扒。有時食厭左,就會去下隔離間紅樹林,上水廣場個間和花亭、 pizza hut,仲有上水中心OK以前隔離個間日本野。撞正要做壁報既時候,我地會拿拿臨食完野行過美意屋買材料,貴就貴左D,不過,就腳呀嘛,打死我都唔行過去中興架啦。記得每次入去美意屋,我一定會行到盡頭個個玻璃櫃睇公仔。食完飯,行番學我地三個成日都一字排開,大聲講大聲笑,根本唔會阻住人,而家唔好話三個人,自己一個人行,都覺得生命危在旦夕,隨時有gip有車仔無啦啦撞埋黎。

派卷個個星期,放左學就會去大M打躉,如果驚M記太熱氣就會去仙茶居飲珍珠奶茶。有時放左學,仲會比阿媽捉去能記雜貨店到買野做阿四,而家個度成條街都變左藥房lu。

呢幾年有新舖或者藥房開幕,我都諗唔番起佢地以前係咩黎。寫寫下,發覺原來呢篇文提過的餐廳已經執晒,唔知幾時開始,上水係我的記憶入面愈來愈模糊。

有人話呢幾年上水的而且確繁榮左好多,但係,如果呢D就係叫繁榮既話,我寧願唔要。



原文連結



No comments: