2016-06-30

【輔仁媒體】麻甩女漢子:識揀一定係揀麻甩女漢子做女朋友 (5954)

(photo via cc Flickr user Diamond Farah)

(photo via cc Flickr user Diamond Farah)

我知我知,好多香港嘅男仔都係鍾意長髮、大眼、斯文嘅女仔丫嘛(最少外型上係鍾意呢類),但阿叔我由懂性以來已經知道自己唔係行/行唔到呢個風格嘅,所以咁多年都仍然係我行我素,粗口照講,頭髮照短,大眼嘅話,間唔屎化下妝畫條眼線TUM下身邊果個囉!

好,講返正題。你首先會問,點為之麻甩女漢子?其實我開始發現身邊好多女仔FD都係麻甩女漢子底,例如好有義氣、非常獨立、時而講下咸野、會講粗口、唔介意食地MAU嘢。我覺得呢D都係麻甩女漢子有嘅特質,咁點解識揀一定係揀麻甩女漢子做女朋友?

首先,佢地真性情,有主見,一就一,二就二,唔會同你扮野扭扭檸檸多廢話,作狀嘅人真係好煩好討厭你懂的。有咩好處:節省好多時間,起碼諗食咩佢都有機會快過你決定!有時甚至令你覺得多左個兄弟既感覺添!

第二,佢地唔會痴身,因為麻甩女漢子多數都唔係會拍拖大過天嘅人,佢地會專注自己工作,自己搵錢自己洗。會自己處理生活上既細節,唔洗你下下湊女要你幫。有咩好處:你會多出好多自己時間同錢。佢都成日一條冷去旅行啦,又洗咩你陪呢?

第三,佢地不拘小節,唔會下下要你比錢食貴野,好多港女次次食野都要食貴野呃LIKE影相,喂呀哥,貴係個景呀,唔係貴係D食物度呀。阿叔我真係覺得食景係非常奢侈的事,我真係覺得食茶記舒服好多架。
有咩好處:你糧尾時候食平D佢都唔會介意,錫住你銀包!

最後,麻甩女漢子好多時都願意同你講甜野嘅,唔係話佢地本身咸濕,而係佢地明白「性」係兩性關係避免唔到嘅問題,關於呢方面,佢地多數會樂意同你好好溝通,甚至會同你進行賽前準備同埋賽後檢討。
咩好處:性生活更加開心囉係咪先?

大家冇仇冇怨,真係唔點你,如果你發現自己另一半係麻甩女漢子,請你好好珍惜佢。不過大家唔好誤會,其實麻甩女漢子都有溫柔嘅一面,至於你見唔見到,就要睇你係佢心目中位置喇!

提示/戴頭盔:有D麻甩女漢子都係長頭髮、大眼同斯斯文文咁架,所以冇樣睇架!麻甩女漢子係講緊性格上同埋大家相處上呀下!



原文連結




No comments: