2016-09-10

【香港01】李聲揚:圍爐有害健康:唔好以為你個Facebook就係全世界 (2839)

唔好只係信你自己Facebook,唔好以為投第個陣營嘅就係港豬、掌心雷、老人院、新移民、蛇齋餅糭……唔好見人講嘢你唔啱聽就話人標題黨。我識成班阿叔都投畀容海恩,亦唔係掌心雷,不過人哋唔會上網話你知。

李聲揚

政治如睇波,大家圍爐取暖最過癮。(Getty Images) 政治如睇波,大家圍爐取暖最過癮。(Getty Images)

好少寫政治,朋友話齋政治如睇波,大家圍爐取暖最過癮。對面嗰條友硬係唔順眼寸寸貢踢到條鞋帶就碌幾個圈扮晒嘢,自己就梗係畀球證針對。我鍾意睇波,但討厭政治(如果呢樣已經令你唔舒服,我建議你唔好睇落去)。

我好抗拒各種標籤,我照計唔係藍絲亦唔係黃絲。講「政治光譜」,我投票投郭家麒涂謹申。有多票我可能投朱凱廸。但我係咪泛民?又未必係。如果有王維基我會投王維基。我甚至唔介意投自由黨,不過我區自由黨侯選人一早去咗歐遊(而事實歐遊前我不知道周永勤是誰,所以都唔會投)。

「我係乜」難答,「唔係乜」就比較易答,基本上肯定唔會投嘅,民建聯啦,各式本土派啦(朱凱迪不在此列,不贅)。不過我有不少本土派朋友,固然個別已經反面,但仍有不少維持住「各自表述」嘅狀況,亦有少數仲會真心交流而不傷感情嘅。

兼聽則明 與本土朋友對談

文首講到,成班自己圍爐最過癮,特別係政治同睇波。但想提升自己水平,同埋想練大自己心臟,唔想咁易畀人激到爆血管嘅,聽唔同立場嘅人講嘢,係幾好鍛煉。選舉後,我同一位本土派朋友傾過吓,以下係我聽完佢意見嘅演繹:

本土派朋友認為,首先人人應該遠離互聯網,停止圍爐,唔好以為你個Facebook就係全世界,聽多啲唔同意見——我估正係呢點,令我哋做到朋友。

兼聽則明,講就容易,但往往所謂「唔同意見」,係「同一意見下嘅不同意見」。捧德國嘅聽下第二個德國球迷嘅意見咁上下,而唔係去聽英格蘭球迷意見。社交網絡製造「迴音室效應」,大把人講過。唔好只係信你自己Facebook,唔好以為投第個陣營嘅就係港豬、掌心雷、老人院、新移民、蛇齋餅糭。

Fact:排通頂嘅太古城票站,18%人投畀葉劉淑儀,高過港島平均。當然你一樣可以話太古城票站好多投泛民,但兩者冇矛盾,唔好見人講嘢你唔啱聽就話人標題黨。我識成班阿叔都投畀容海恩,亦唔係掌心雷,不過人哋唔會上網話你知。

朋友亦同時認為,本土派呢個槪念,已經玩完——本土派定義人人不同,佢只計青年新政同熱血公民。

但我有點奇怪,拎到3席都仲玩完?

佢意思唔係「本土派嘅候選人」玩完,但「本土派」呢個概念,見咗底,好難再谷到新嘅支持者出嚟。港獨,中港區隔,驅蝗之類乜都出晒,冇得再盡的了,個餅唔會大到幾多。而呢3個議席,大家亦深知唔會推到乜。剩返嘅,除咗配票(但對本土派應該冇乜關係),就係搶票。即係,搶傳統或激進泛民嘅票。而在呢個過程中,必然就係你妥協,變為冇咁激進——而事實你見選到嘅幾個本土派,都係相對地比較「入屋」的。

第三,谷到去58%投票率,特首民望又咁低,應該乜民意都谷晒出嚟。

投票率上升空間唔大(呢句我講嘅),而民意亦都好清楚話你知:香港人係稍為pro-反建制,但絕對不能急,不能激,你再鬧都冇用,你Facebook日日鬧港豬都冇用——《滿城盡帶黃金甲》話齋,「朕不給,你不能搶」。主流選民用選票話你知,佢哋要泛民,但只係新泛民,甚至唔係激進泛民。本土嘅,都係要「冇咁多稜角」。所以你見上位嘅,係劉小麗,羅冠聰,游蕙禎,甚至係集左膠同勇武本土於一身嘅朱凱廸。香港人都係和理非底,選羅冠聰朱凱廸好激進㗎啦,慢慢來吧,你等唔到?都係要再等。

但又同樣地,中間路線,溫文路線,未必易做。馮檢基下馬,王維基方國珊都選唔到(我補充:其實唔係爭好多,但只怕下次爭更遠,如果仲有下次),湯家驊堆民主思路更加係冇人理。

太古城票站晚上仍有逾千人排隊,但其實該票站有18%選票是投給葉劉淑儀,高過港島平均。(蔡正邦攝) 太古城票站晚上仍有逾千人排隊,但其實該票站有18%選票是投給葉劉淑儀,高過港島平均。(蔡正邦攝)

上少啲網 跳出迴音室吧

再重申,個餅真係再大唔到幾多。建制嘅鐵票都似乎見頂,佢哋可以協調好啲,但似乎冇乜新票再走出嚟。上面講咗其實本土派都係咁上下。真係叫做Strike Back嘅,係傳統泛民。未來10年你都唔會見到民主黨少過5席,睇少啲《偽民主派賣港實錄》,圍少啲爐。

雷動計劃雖則畀人鬧到九彩,甚至「受惠」嘅民主派都鬧,但,威力係有嘅,亦令之前好多所謂「科學」估計結果錯晒。因為啲選民始終係人,唔係量化模型下嘅粒子,可以畀你蒙地卡羅(指Monte Carlo Simulation)咁掟嚟掟去。你睇鄺俊宇最後關頭吸嘅票,幾乎多到踢返走涂謹申。人嘅行為當然都可以「量化」,但絕對唔係咁易——至少你要了解戴耀廷嘅心水先。

冇用嘅係地區工作,真係冇用的,好多空降嘅都當選,同時間好多所謂深耕細作搞民生嘅都選唔到。有用嘅係選舉論壇,本人(同埋我朋友)都對選舉論壇深感厭惡,水準之低真係夠做國際笑柄。但不能否認,唔好以為你個世界就係全世界,好多人一路鬧一路睇,亦因為論壇嘅表現對候選人加分減分。最好就係剪到有sound bite,好似K.O.人哋咁,本人厭惡嘅劉小麗高票當選,論壇都功不可沒(而to be fair,唔講立場手段,劉小麗講嘢嘅技巧,辯論嘅功力,都比絕大多數候選人為好)。

最後,乜陣營都好,乜人都好,唔好圍咁多爐。Keep your friends close and your enemies closer。叫你買份左報睇應該太匪夷所思,但上少啲網,其實唔難。當然有啲一開始已經覺得正邪沒有中間,反對我嘅都係港豬嘅,就祝你好運。泛民都圍爐圍咗好多年,先學識入屋做地區,先知唔係賣「民主」兩個字就有票自動送上門,再用咗N年先開始學識配票。

(文章純屬作者意見,不代表香港01立場。)



原文連結