2017-01-19

【輔仁媒體】鵝鑾鼻燈塔:純講PR,今日個記者會,鬍鬚就真係贏林鄭七百條街 (1968)

其他野咩都唔講。

當中既演辭,點樣香港仔香港夢從回流到走入建制咩咩盛,咩都唔重要,到最後你估D選唔到既人茶餘飯後會得閒睇字咩?都係睇圖。如果睇圖睇相,我就真係唔知邊個咁高竟然叫晒D團隊出黎大合照,營造到好似真係好人心歸向,好和諧既模樣。

呢個係絕既一條橋。林鄭好打得,係人都知,係深入民心既。但係佢太叻,太勁,成日都係一個人自己上路,打晒所有野,就少左一樣叫TEAMPLAY既精神,即係無親和力。你睇佢最後頂晒個記者會,都係叫得陳智思一個出黎影相。果種689既孤高味,本來你都唔係好覺,但係到鬍鬚一出黎,三唔識七,成堆前高官類物你有排去逐個逐個搵去認,全部出晒黎。佢地成班團隊,仲要好似已經食晒迷藥咁,準備好晒去拜年咁既樣,一副喜氣洋洋,你估有心人聽日唔會識SPIN?係呢SUBTLE一點,唔到你唔服。

好多人都話鬍鬚HEA,無建樹,甚至辦事能力唔及林鄭,講野又口窒窒。但係呢個反而變番轉頭做SELLING POINT。因為已經聽慣太多語言偽術,倒果為因,依家聽下漏口講下人話,「相對較為忠實」少少,起碼講句都叫做順耳D。然後佢強調既,更加唔係一個人ONE MAN BAND,而係團隊精神,願意聆聽,願意接受,呢招一出,我諗林鄭都要即刻閂埋門度橋,遲D要更加深入民眾大玩慈母溫柔形象去挽救。

咩折一枝竹易,折兩枝竹就難,係老土,但香港人好多都鍾意老土野架。依家鬍鬚就係同你講,林鄭你叻到曉飛無用呀,但係講要融合番成個社會,修補裂痕,我做到,你咪就唔到囉。呢個唔係關乎個人能力問題,係講先天性格同基因呀。係呀,政治就係咁單一。政治就係咁淺薄。政治就係造勢。

雖然鬍鬚好沉靜,亦都似乎比建制派冷落,但唔HARD SELL,就係個主調。如果真係當七百萬人選,佢周街走玩親民,暫時的確係超級成功。我地不去談論831,不談全民退保,不談23條立法,特首係死位,邊個上去都死的話,佢跟足五年前梁振英一摺凳一筆記,冧爆草根,今次佢就主打中產同青少年渣嘛。唔講政治,講PR講包裝,呢個選戰,都仲有一定參考價值既。

至於葉劉,佢喊佢自己知乜事啦。佢玩完架啦。

【專題:2017特首選戰】

關於作者:鵝鑾鼻燈塔
鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/



原文連結




No comments: