2017-01-18

【輔仁媒體】鵝鑾鼻燈塔:香港人已經唔相信美好嘅事物會發生喺呢度? (671)

世界各地,尤其係某些國家,總有堆人係咁。佢地D基因硬係缺少左D野,係無左欣賞既文化。即使有好事,都唔會識得戥人地開心。反而,第一件事就係眼紅人地,係咪出於妒嫉就唔知喇,總知總係覺得入面有其他不為人知既事,之後挖一個可以俾自己無限發揮既洞,去上綱上線。呢個可以話係人既劣根性。

之前講過,一D上左年紀,或者有番咁上下輩份既「舊海鮮」,往往都會將所謂既經驗之談硬塞俾你,但並唔係想你好、有建設性果種,而係純粹想令你單純感到挫敗,或者要你強行跟隨佢自己果一套。所謂既「及早看清現實」,其實不過係佢自己既片面之詞,邊個話佢果套一定岩?可能佢之前失敗,原因不在方法,係出係佢自己身上。但佢就叫你「看清現實」,「唔好咁天真」。係不知就裡,或者無法比較既情況下,佢就宣告左你既死刑。

除左欠缺欣賞人既精神,呢個社會亦都趨向玩無可玩,SPIN無可SPIN,所以開始極度排斥平常、令人安樂既事物,而要追求不正常、歪論、甚至係陰謀論。如果只係講兩小口子開開心心買平飛去海洋公園,此POST已完,仲邊有討論既價值?於是就當然要有人去挖多D古靈精怪既野出黎,就算只係自己幻想都唔緊要,FF得愈深愈有味道。既然都已經鬥開慘,好人好事梗係要被鞭策啦。唔係邊有「憎人富貴」呢四隻字?

做人其實只係想講求平衡,不要過份樂觀,亦不求凡事太悲觀,係正常情況下,無必要第一句就要揭盡人情所有陰暗面。只不過,係民智未開,或者係民智倒退,社會舊有美好價值觀已經盡情俾各種壞事物去變化扭曲,人自然會變得不正常(先為之叫新常態呀),所以就算面對住毫無過犯既普通人,都有「見人仆街最開心」、「我睇你風光得幾耐」呢種論調,愈MEAN愈有內涵,愈刻薄愈有深度,愈係看破世情。無論你做左咩野事,你到最後都會俾人攻擊。

除左客觀事實不受重視,呢個都係社會另一個悲哀黎。



原文連結