2017-05-16

【輔仁媒體】鵝鑾鼻燈塔:【3歲油到咁】依家班為人父母親,憑乜嘢教仔女做人要誠實,唔好講大話,要有誠信? (15031)

3歲可以油到咁~:) Wawawa Wai 圖片

依家諗番:我覺得我細過果陣因為無交功課、偷食糖、唔溫書、掛住玩。。。而講大話,比屋企人瘋狂藤條炆瘦肉,係好冤枉既一回事。成日都教人做人要誠實,唔好講大話,要有誠信,但頂你地依家班為人父母親,係點樣實行身教的?

明明係細路既功課,佢唔識做,你又幫佢做。於是個個父母親全部偵騎四出幫拖,結果一份勞作,隨時十幾廿個人牽涉埋真係做ART/DESIGN個唔知法國留學生PERRIE TE幫埋佢做。結果只係變左大人之間繼續軍備競賽。「個個都係咁樣架!你唔幫佢考第尾影響前途!」細路唔知你做乜,但看在眼裡,已經知道做人都係食花生最盞,自己駛乜出力?

我覺得人既天性,動物既天性,講大話係本能黎。細路仔講第一個大話,多數就係因為佢驚俾老豆老母先生罰,所以講,呢種就係意識到危險底下既安全保護機制。如果溝通做得好,你或者可能真係可以令佢講少D大話,(如689一樣既大話精例外),先可以不斷灌輸佢知咩為人忠直先係古人先哲既所謂核心價值,之後甚麼仁義禮智信,做個君子好過做小人,做人要做好人,先可以慢慢好似高樓一樣,從地而起。。。

但我呸!正如我講左N次:依家仁義禮智信值幾多錢?講大話最專業既人,第時係可以做特首的。而做特首係可以有錢同埋有官邸住,唔需要住劏房。呢D就算依家細路唔明,大人父母都一定會明,然後又係一種「無辦法啦世界係咁架嘛」迫於無奈接受既現實。於是一個三歲交出既填色比賽,竟然可以有用色準確,層次分明,陰影鋪陳,一蓋俱全。

本來一個好D既教育制度,係可以減少呢D軍事競賽假大空發生。但正如制度一崩壞,尤如舊時既衛星農田,以致到依家既一帶一路全世界市場網絡大包圍網,連同依家開始不斷吹奏既大灣區甚麼融合,都係愈吹愈虛,愈虛愈有市場。面對如斯眾生,如果你仲想清醒,你都只能夠冷笑一聲,係午夜自斟自飲,順個靚便,為蒼生,為香港,再奠三杯。

「但願我兒愚且魯」,但後一句都係「無災無難到公卿」。忠直之人歷史上無好下場,亦會俾奸人當道既社會玩殘。唉。

關於作者:鵝鑾鼻燈塔
鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/



原文連結




0 comments:

Post a Comment