2018-07-11

【立場新聞】人在中環 - CK:正因為關心競爭力同錢 我更唔希望普通話成為呢個城市主要語言 (468)


同兩個做咗老豆嘅朋友吹水,講開普教中嘅問題。一個舉腳贊成,另一個拍曬檯反對。我呢,係另一個條氣好唔順而反對嘅人。結果係二對一,幾個麻甩佬嘅聚會,結果係不歡而散。

佢哋嘅理由,其實有N個人講過無數次啦。贊成嘅,又係嗰啲甚麼未來都係中國嘅天下,唔學好普通話會冇晒競爭力,乜春都落後於人咁上下啦。反對嗰位,覺得母語係必須守護,用廣東話讀中文讀唐詩宋詞先夠正宗(嗱,佢講的,唔關我事,我自己從冇考證過),普教中搞到個個細路啲中文學到唔湯唔水,學術上同道義上都係不能接受。一個講現實講錢,另一個講道義講學術,咁雞同鴨講啦。

咁我係個商人嘛,都係傾向講現實同講錢啦。問題係,正正因為關心所謂嘅競爭力同埋錢,我就更加唔希望,普通話會成為呢個城市嘅主要語言。學多一種語言絕對冇問題,我甚至有份叫我個仔去學好普通話添。係人都知道,學多一種外語有能助競爭力,呢個亦係好多中產家長,根深蒂固嘅「信仰」。但記住,增加個仔將來嘅競爭力,係佢比其他人識多一種「外語」,而唔係令佢長大後喺工作嘅時候,要逼住用「外語」作為主要溝通嘅語言。前者係增加競爭力,後者正正係相反,咁當你班友仔舉晒腳贊成普教中嘅時候,你究竟係想得到前者還是後者呀x你?

香港係唔會死的。會死嘅,只會係香港人。或者to be exact,係舊嘅香港人。舊嘅香港人,無論你點樣學好普通話,學好簡體字,只要你喺香港長大,我諗唔到你可以點樣變到身做新香港人。現實如我,即使唔講甚麼民主呀、道德呀…呢啲精神價值觀有關嘅事啦,講搵食啦好冇?只係再過多三五七年,仲有冇得俾你食先?你不但止唔去保住自己原有嘅主場優勢,仲將一切有利自己嘅規矩、文化、工作模式都拱手相讓俾人,呢啲唔係叫做融入,唔係叫做放眼大中華,而係叫做自毀長城呀仆街。

屌,你真係以為自己個仔學好「外語」就會好有競爭力?香港人係綿羊,一直以嚟都係靠主場優勢先至保得住有啖飯食。就算你講得一口流利「外語」,你都係一隻綿羊,唔會變咗隻獅子㗎。對於來自彼鄰嘅豺狼而言,即使係隻講流利普通話嘅綿羊,其實都一樣只不過普通係午餐一頓。明冇?

本來仲諗住一齊睇波,家陣食自己了。

(原文無題,題為編輯所擬)

作者facebook



原文連結



0 comments:

Post a Comment