2018-08-07

【立場新聞】鍾劍華:突然間對林鄭泛起一點點的同情! (740)


冇計啦,佢可能為咗個仔嘅前途、可能為咗自己嘅名聲與權位、也可能為咗自己虛榮嘅自尊。特首喎!仲係第一個女特首喎!777 票「高票」當選喎!佢「咁打得」、咁「善於搞政策」、咁「熟悉政府嘅運作」、自己感覺咁良好、又得到神嘅諭示,有乜辦法唔匍匐於這個咁大嘅誘惑!

做人做到咁,真係冇晒尊嚴,佢其實已經自閹到好深。一年下來,真係越閹越深,深到入肉見骨。堂堂天子門生,港英體制下的管治精英,搞到如斯田地,其實都可算是幾折墮。

《大公》咁講?依家代表佢阿爺的喉舌擺明唔滿意喎!唔夠皮喎!依家佢嘅前度擺明無面俾,要踹落佢睇個場喎!

權力就如春藥,但係特區阿一這個位,分到入口嘅只係過期偉哥。但對於不受監管,喜歡為所欲為、慣於隨心所欲的北京當局及以為上了神枱的梁振英之流,佢一年多來嘅順從及久不久嘅自動獻身,已經挑動起更難抑制的權力欲望。睇嚟未來幾年,佢嘅日子唔會好過。所以突然間對佢產生一點點嘅憐憫!

但係認真諗落,佢真係唔抵可憐。除非北京真係挾持佢老公同個仔做人質夾佢上位,否則牛唔飲水點㩒得牛頭低,食得鹹魚就要抵得渴。全部都只係自己攞嚟,唔抵可憐。而且,過去一年佢咁搞法,態度上係歷任特首最鵪鶉、最擦鞋、最主動做奴婢,只係無佢前度咁下流、咁無恥、賣相咁差。佢咁樣做特首,其實即係將香港及香港人變成人質,變成佢嘅陪嫁妹仔,隨時要俾人一齊推入新房、抬上大床。誤港誤人,莫過於此!咁樣做特首,佢直頭係累死香港。佢其實絕對唔抵可憐!

 

原刊於作者 Facebook



原文連結



0 comments:

Post a Comment