2018-09-09

【立場新聞】許煦:【敗者復活戰】浸大爛 grade 藝術展 (781)


開學流流,浸大視藝院班學生又有新諗頭。台灣最近咪搞咗個「失敗新聞攝影展」嘅,佢哋就搞返個 art school 版本嘅「爛 grade 展」!

視藝院班學生一早 book 定顧明均個展覽廳,琴日響 Facebook 度開 post 招作品,誠徵舊生嘅「佳作」。參展人年齡不限,畢咗業幾多年都得(只要你件嘢仲健在);作品媒介亦不限,繪畫、雕塑、玻璃(甚至論文都非常歡迎);舊作唯一要求係——佢曾經為創作者帶來 C+ 或以下的成績!

嘩!屌!咁咪即係無限輪回鞭屍?

呢層你可以放心,主辦單位講到明,所有展品匿名處理。你可以寫過份 artist statement,將垃圾寫到天花龍鳳,實行嚟一場「敗者復活戰」!

諗諗吓,其實爛 grade 又有乜好怕喎!

歷史證明世俗嘅眼光,總係跟唔上藝術家嘅創造力。想當年,印象派先師莫內嘅名作《日出》,喺 1874 年首次展出嘅時候,評論家 Louis Leroy 喺雜誌度寫話,筆觸咁粗糙,構圖又咁隨意,十足草稿咁,未畫完咁就拎出嚟,仲笑鳩佢「印象派」添。當時咁諗嘅其實唔只 Leroy 一個,好多人都覺得對比一直以來見到畫得好仔細嘅作品,莫內 and friends 嘅畫簡直垃圾。

事隔百幾年,我哋睇返藝術史嘅發現時,又有邊個唔會講「印象派」呢?十九世紀上半,法國已經發明咗相機。有咗相機之後,你畫功再勁,畫得再好都唔及張相。咁畫畫嚟仲有咩用?正正就係呢個時候,莫內佢哋就用粗糙嘅筆觸 challenge 當時大眾對於「藝術」嘅諗法!當時嘅人接受唔到,唔代表係垃圾,只係佢哋唔識得欣賞啫~

鏡頭一轉返嚟 2018 年嘅香港,你今日喺 AVA 攞個爛 grade 又如何?他朝可能帶領潮流,成為一代宗師添呢? 所以話呢,藝術滿希望,前路由你創呀喂!



原文連結



0 comments:

Post a Comment