2018-09-11

【輔仁媒體】Su子:有個愛好H game 嘅ex 恥笑過我:「啲正版咁貴,邊有人買架?」,結果佢鍾意嗰間嘢執左 (457)

《同級生2》的製作公司elf 已經倒閉

自從上網越黎越方便,好多影音舖、書店執得就執,剩返既都係比較大型既連鎖店。

筆者有日路過HMV,睇見《Game Of Thrones》出左一至六季既DVD,心動左一下——都係等佢出哂先再買,期待box set~

一直都好堅持買正版碟、正版書,由小學開始追《數碼暴龍》既歌開始,將所有零用到任何獲得金錢既方法都儲起佢。家境並不富裕既我,小學到中學都係冇電腦用,反而造就左我想聽歌就要買碟既習慣,加上CD既音質真係好好,MP3真係冇得比。

好細個開始,就明白世界上所有野得黎都係唔容易,所以果時我既志願都係要做一個有穩定收入既專業人士,咁大個就可以盡情咁買我想要既野~

包括大部份細個時買唔到、買唔起既野。
縱使,我發現而家就算買得起都好似冇左細個時「擁有」既快樂。

我只係個星斗市民,冇大錢衝去當地支持、用時間瘋狂考據、去識個原作、買起間出版社、控制業界。。。。。。
好多時都被評為唔夠die hard,課金買碟、書、周邊商品就係我作為fans支持自己喜愛之物既方式。
因為我知道藝術家都係人、都要食飯,創作背後既辛酸非一般人可理解,而且有時我會諗D商品係有限價錢,到底佢地要賣出幾多商品先有賺呢?
每次我聽住自己心愛既CD就不期然咁諗,所以每次見到自己支持既Artist有得拍廣告、偶爾出D主流野都會覺得好開心。

好多人成日笑我on9,網上咁多資源共享、香港地方寸金尺土,點解仲咁傻仔真金白銀去買野?
因為我唔想有一日,由於輸左比盜版、太多非法下載而令到間公司、出版社認為冇錢賺而唔再得再出,或者因為經營困難而冇資金做下一套作品。

好既作者能做出好既作品,都需要人個可以支持自己基本生活既環境吧?
畢竟,就算科技點發達,世界上都冇人有能力以光合作用為生吧?

香港人都推崇上網download、某國既盜版資源,認為買正版同用錢支持自己所愛的都係on9仔。

其實,到底點解受咁多教育、係咁文明既香港生活,大部份既香港人會有呢D價值觀呢?
點解香港人永遠都冇支持自己所愛既概念呢?

諗起有個愛好H game既ex就恥笑過我:「啲正版咁貴,邊有人買架?」,結果佢鍾意果隻game既公司因為缺乏營運資金而倒閉了;
另一個鍾意日系衫既女仔:「上淘寶咪平啲囉,都唔會有人識分架啦!」然後,佢喜愛既品牌係前幾年因為營運困難而倒閉了。

佢地其實知唔知自己鍾意既野,背後係有一大班人造出黎?
有成堆人靠呢D野食飯、養妻活兒?
憑乜野覺得自己可以免費享受人地既成果?

尊重知識及創作產權一黎係修養,二黎係希望自己所愛之物有能力可以持續落去。

將心比己,有次係聚會上再見,佢地不約而同都分享,大學畢業見工俾人話:「你咁貴,邊有人請?」,算唔算現眼報?

關於作者:Su子
香港土生土長的八十後,曾立志讀好書去服務社會上最卑微的人,開始工作才發現所謂的「卑微」源於剝削,堅持在自己能力內減少不公卻漸漸明白自己的無能為力。喜歡音樂、電影、博物館、漫畫、閱讀、生物學、心理學。在營營役役的生活中,試圖在文字中找回自己。


原文連結



0 comments:

Post a Comment