2018-10-08

【立場新聞】朝雲:理大學生會長:如果連大學的言論自由都守不住,香港的言論自由將會消失 (683)


7/10 絕食兩天,仍然堅持

學生會長:如果連大學嘅言論自由都守唔到,香港嘅言論自由會消失。

* * *

問:絕食即將接近兩日,感覺點樣?

林穎恒(右,學生會長):開始冇感覺。。。

阮柏喨(左,評議會主席):身體還好,但絕食左一段時間,會諗番當初為咩而絕食,同自己講去到依一刻更加唔可以退讓。

唔可以因為肚餓,或者想要下台階而放棄,企得出嚟就要直到有成果為止。

* * *

問:當初點解會決定絕食?

阮柏喨:我地已經發信,發聯合聲明,做左好多嘗試,畀左好多時間要求校方交代,去到最近上樓要求公開對話,結果都冇,升級都係迫於無奈。

直到我地佔領同絕食,校方先有多啲回應。如果我地唔肯做依步,只係寫吓立場書,收吓聯署,就冇可能有邁進。

* * *

問:媒體報道校方建議開會,你地接唔接受?

林穎恒:我地唔想校方安排閉門會議。關於民主牆嘅管理,關於言論自由,點解唔可以俾大家知?民主牆係屬於師生,唔係屬於我地兩個,應該要同大家交代。

接唔接受會議要繼續商討,但關鍵係民主牆嘅言論自由。如果爭取唔番民主牆嘅使用權,即使我地同校方開會,都會絕食落去。

* * *

問:網上又出現爭論,批評絕食「泛民」、「冇用」。絕食抗爭嘅最大艱難,就係對方想用拖字訣瓦解,陷於膠著。你地點諗?

林穎恒:我地唔能夠有 100% 把握先去做嘢。諗到有咩可以做就要去做。有 5%、10% 可能會成功,都應該試吓。

面對拖延我地好無奈,主導權喺校方手上。我地想大家明白,絕食唔係為左自己,係為香港嘅言論自由盡一分力。如果連大學嘅言論自由都守唔到,香港嘅言論自由真係會消失。

* * *

後記

訪問時值兩位學生絕食 40 小時。正當筆者撰寫訪問之際,校方終於應允學生訴求,絕食結束。



原文連結



0 comments:

Post a Comment