2018-10-11

【立場新聞】仙道彬:人工島大到不能「賭」 (916)


電子煙、東西隧,都係小事。頂頭大事係新界大把地,都夾硬要起個人工島,整個明日大嶼計畫。

好簡單計條數,投放至少5,000億,甚或隨面積加大而去到7,000億,仲未計通脹同計錯數,以高鐵超支作前車,分分鐘去到萬億或以上,咁香港自豪的儲備,屆時真的是一鋪清。就算計成本,一呎都要1,500蚊,再加埋建築成本,那為何不在新界換地?用最正常的諗法,就係建一個冇人住的孤島(唔好笑,你睇郵輪碼頭就知政府一定可以做到),不損害發展商利益,又可以用漂亮包裝去花光儲備,林鄭的機心,比前幾個特首高了不知多少。

若果真係幫到市民安居樂業,都尚算係好事,錢花了都有價值,但最大問題係經山竹事件,見到超級颶風問題,家陣好多離島都未回復舊觀,若是在海中心的人工島,個風正面吹襲時會有幾恐怖?當幾十萬人搬入去,有事如何疏散,誰保他們安全,種種支援救助如何解決?不如以為百年一遇,大多氣象專家都指,颶風走向已不同,昔日作屏障的菲律賓亦不再可恃,未來幾年,必定會見到。

大白象,當初一定吹得有咁大得咁大。高鐵每日八萬人次,為香港帶來遊客和消費,不過數周,已知吹大咗,今次人工島,吹得更大;香港人不是白痴,聽到林鄭要將「東大嶼都會建成規模如中環的核心商業區」,真係人唔笑狗都吠。你去問問紅磡海濱廣場的白領,杏花村的居民,夠唔夠膽去人工島返工,入去安居樂業?

香港地少人多,要移山填海,的確係由細聽到大的論調,但建基於人口大幅增長,但今日時移勢易;由林超英的:《宏觀看人工島——只輸不贏的世紀大賭博》中可見,這個人工島計畫不是沒前人想過,而是「大到不能賭」。

「比較多人注意的是興建人工島的費用,以政府原本規劃的1000公頃規模估計,填海造人工島及興建接駁道路和鐵路至港島、九龍、新界,需費約4600億元(還未計供水、供電、供煤氣、興建公共房屋、眾多配套公共設施等);若規模增至2000公頃,則估計耗資逾7000億元。領教過近10年大型工程例行大幅超支,我們必須把人工島視為萬億工程來考量。香港政府財政儲備於上個財政年度結束時,才歷史性首次高於1萬億元水平。即是說2000公頃人工島等於把政府全部儲備貫注入大海,是一場可能「一鋪清袋」的世紀大賭博。一不小心,政府可能破產。這是市民萬萬不想見到的終極恐懼,因此認真探討人工島的必要性和科學地論證人工島概念都是十分重要的。」

發展商囤積居奇而不是新聞,新聞是漠視此點而孤注一擲,將萬億儲備押在2032年才初步收成的美好藍圖之上;香港自豪的種種,如儲備,如司法,如警隊,如教育,如獨立地位,早成了「有心人」眼中刺,在中共銀包乾涸下,金蛋既不能解燃眉之急,那不如將金雞屠宰,一舉兩得,既可得財,又令港人更仰賴中共。

港人無罪,懷璧其罪,當計劃落實,前期可能都花上千億,屆時人工島大到不能「倒」,一切如倒錢落海,你有幾多儲備,就要你幾多,慘過借貴利。呢一套,由八萬五到人工島,同出一轍,美其名係藉基建創造就業,讓港人有發展機遇,促進經濟同就業,結果就全部都係假大空,錢就冇啦,仲爭落一身債,同小白面氹無知少女,為美好將來下海賣身一樣,到發現真相已太遲。

「你唔做舞女我邊有錢,我冇錢點養你呀?」

仲未計當藍圖描繪而成,每日分分鐘加多100個單程證㖭。家陣香港人生活質素已有目共睹,衣食住行離地價錢,入醫院排到死埋都未到,而就算想入土為安,都一樣咁貴,咁多問題,源頭在哪?

終身年金唔落搭?可惜一班港奸依然送你死,由高鐵、港豬澳到人工島,一波未平,一波更貴。當以港人住屋問題作幌子,大條道理,最好笑係一批專家不斷話,填海係最快的方法,但分分鐘要等15-20年,我睇唔到收地建屋會慢過佢。一萬億儲備,不用50年就消磨殆盡,屆時港人光環早已消失,既無獨立地位,對外也早被國際視為中國一省,要基建冇錢,廣東話也已消滅,真真正正一國一制。

#香港人齊齊下海
#人工島焗你賭
#射落海都唔益你
#萬億儲備一鋪清
#慘過做舞女
#因為一世都冇得上岸

原刊於作者 facebook



原文連結



0 comments:

Post a Comment