2018-10-12

【立場新聞】Lunyeah:【新殖民政策】新移民來港一定等於家庭團聚? 我用例子答你 (3253)


林鄭學埋左膠D論調,成日開口埋口就講:「單程證來港新移民係家庭團聚,是人權,不應排斥」。左膠又日日不停洗腦咁話,新移民的配偶必定係香港人,來港時住在配偶家中,不會增加香港居住負擔云云。乜真係事實咩?先不論點解一定要響香港團聚,唔可以響所謂的「大灣區」團聚,問題係:新移民來港就一定等於家庭團聚?

我唔直接答你,我用例子答你。

上年8月29日,長沙灣發生墮磚殺人案,一名叫輝哥的地盤工不幸送命。根據《東方日報》報道:「慘死的「輝哥」5年前與妻子來港定居,雖然年過60,但無其他技能,只能做體力勞動搵食 ... 據悉,輝哥一家5口原居內地,2012年夫婦成功申請來港,獲派慈雲山慈民邨公屋,3名年約30歲的兒子則留在內地。輝哥在玻璃幕牆公司做雜工,穿梭於各個地盤工作,負責「搬搬抬抬」及雜務工作,日薪約700港元。他約一個月前被調派至大嶼山人工島工作,今日調回到長沙灣地盤上班,詎料送命。 」

呢位地盤工慘死固然係不幸,但睇返報道內文,佢兩夫婦都係大陸人,死者年過60又冇技能,咁2012年時究竟係憑咩申請來港?你唔係話我聽佢係透過「優才計劃」來港呀?明明有三個年約30歲的兒子響大陸,原本一家五口都響大陸居住,點解要個老父六十幾歲先來港做地盤呢?咁樣算係乜野「家庭團聚」呢請問?更何況佢地來港無耐就獲派慈雲山慈民邨公屋?請問佢地一家大陸人點解可以咁快上樓?而土生土長香港人就等極都冇?

另一個例子,上年十月,港鐵女工遭醉酒男推落輕鐵路軌單野,當日《蘋果日報》報道:「娣姐今年7月由惠州申請單程證來港生活,現時寄居胞姐家中,靠清潔工作維生,每月收入約7千元,現時未知何時康復,擔心手停口停。她於內地育有3仔1女,丈夫亦於內地工作,她暫時未有向家人透露受傷一事,怕他們擔心,直至30號覆診及拆線後才會如實告知。」

港鐵女工娣姐無辜被推落路軌,我深表同情。但睇返報道,最奇怪既係佢丈夫究竟係咪香港人﹖如果唔係,佢究竟憑咩申請來港?我就退一萬步當佢老公係香港人但響大陸工作,即係佢地一家六口原本都係響大陸居住及工作,咁娣姐申請來港又算係乜野「家庭團聚」,有何必要?單程證制度響呢度根本就係將原本一家團聚既家庭「硬生生拆散」!只係為左方便某D大陸人可以來港居住(順便申請其他福利)?咁當然有人會話:「佢地有自由咁做既﹗」問題係點解香港人要為佢地埋單?尤其是佢地明顯唔係真係為左家庭團聚而係為左其他(經濟)理由?

第三個例子。早幾日深水埗大南街劏房發生謀殺縱火兼自殺案,一名59歲地盤工人慘遭殺害。《蘋果日報》報道:「周妻表示,與丈夫結婚20多年,育有兩名現年24歲及26歲兒子,兩子在廣州做 IT 工作,而其丈夫原在內地任司機,6年前丈夫與兩胞弟來港,其後丈夫與一胞弟留港從事地盤工作,並獨自租住大南街劏房近5年,月租3,200元,她則中港兩邊走,並於一年前獲發單程證,但她主要居於內地開平家鄉,只間中留港居於劏房,惟夫婦經常聯繫。」

又係差不多的情況。死者與妻子本來都係大陸人,死者原本做司機,6年前離開妻兒子女來港(究竟點申請來港?司機又優才?不如話係大陸學生丫!),一直住劏房,之後仲申請埋老婆落來,但兩個仔都留響廣州工作既咁又「家庭團聚」呀?如果冇單程證,佢地一家四口響大陸生活,好可能比來港住劏房好呀。咁當然,命案既野冇人估到,呢單案入面死者死得真係好無辜,我無意在傷口上撒鹽,但問題係呢D都只係冰山一角,要搵根本仲有好多。

事實係咩?就係有唔少新移民並非真正的家庭團聚,而係利用單程證的漏洞來港。香港冇單程證審批權,任由大陸亂批,呢點已經講到爛,應該冇人會反對啦?簡單既就賄賂大陸D官,咁你就明明同香港人毫無血緣關係都唔知點解會獲批來港。複雜D既就先搵個香港人假結婚(或存心騙婚),申請來港拎到身份後就離婚,然後又同另一個大陸人結婚,又申請佢同大陸子女來港,如此來回反復,生生不息六六無窮,團聚無了期!呢D都已經有好多相關報道,都唔算係咩新聞了。

就算真係有血緣關係,都可以疏到你唔信。左膠成日講話「新移民的配偶必定係香港人」,呢個根本唔係事實。半年前左膠大本營香港獨立媒體有篇文叫〈家庭團聚的荒謬〉,作者係前懲教主任,文中指出:

「但我又看到另一面,就是他們的親戚關係,我和一位婆婆傾過,她是來港和女兒團聚,另外一位叔叔就告訴我,他的姪女嫁了香港人,就憑著他是姪女父親的細佬,因此,也得到批准。大家無需要質疑我提出這兩個個案,相信這只是冰山一角,若果這兩位老人家,在美加一定無得家庭團聚,而更荒謬的就是,婆婆也申請了他的兒子一家來港,據講等兒子夠六十歲退休就會來。因此,我從來都不認為單程證是移民,根本香港不具備審批移民的資格,我真的不明白,為什麼屋主個阿叔,又或者屋主個舅父都可以申請,更獲得批准。」

屋主阿叔、舅父都可以獲批做「新香港人」呀!你話幾咁荒謬!請問憑咩要香港人接收佢地呢?所以結論就係:每日150個,一年5萬幾個配額既單程證制度一向都係千瘡百孔。真正的家庭團聚究竟佔幾多成?假結婚佔左幾多成?就算係真結婚,因單程證制度而造成的婚姻悲劇、倫理慘劇又佔左幾多?唔係話要一刀切,禁止晒所有新移民,而係大家要明白,一句「家庭團聚是人權」根本唔係必然,唔能夠客觀反映香港實況,亦無助解決香港面對緊既問題。點解香港人冇單程證審批權?點解單程證配額連傾都冇得傾?喂!明明1995年之前,單程證配額係每日75個架咋!點解加一倍就可以,減一半就「違反人權」?咁駛唔駛加到每日1500個先彰顯到「家庭團聚的人權」?

講到尾,咪又係果句,因為而家大陸殖民緊香港丫嘛,日日換血溝淡你香港人丫嘛!咁呢D係「新殖民政策」,緊係唔會同你讓步啦。咁呢點就大家都心知肚明架喇。但問題係,仲有好多自稱反共既左膠呀、大中華膠呀,對於以上種種問題視而不見,仲繼續幫單程證制度護航,完全無視呢套機制幾咁破壞香港、加重香港各種負擔,咁對於呢D助紂為虐既人,我地當然要寫文痛斥啦!



原文連結



0 comments:

Post a Comment