2018-11-07

【輔仁媒體】毒舌男:東涌人 你值得擁有 (806)

話說港珠澳大橋通車後,東涌被非法中國團攻陷。有東涌街坊甚至話,陸客更以屋邨街市作景點,嚴重影響日常生活。小弟作為東涌開荒牛,見盡街坊對社區事嘅冷漠。部份因為受惠於機場就業而埋怨你「阻住地球轉」,話香港要發展等云云。好了,到今日大橋通車,你哋 投了支持發展的民建聯N年求仁得仁;除咗「我真係恭喜你呀」之外,我都真係唔知講咩好。

1997年年底,東涌新市鎮樓盤陸續入伙,當時包括小弟在內嘅一群熱心街坊,做咗好多網上網下社群去凝聚一眾開荒牛,睇住東涌附近嘅發展。果陣,最出力果個叫安劍英,亦即係東涌老記。成班人開地區討論版,搞地區報(東涌報),做東涌綫網上預報開車通知,甚至搞咗個東涌單車節出嚟。結果呢?你們冇珍惜,反而聽咗民主大台,令東涌萬劫不復。

安劍英散盡家財幫東涌,換來嘅係被民主黨大佬暗算。話說2003年71後,果陣有個有大嚿支持嘅人,諗住順71之勢得利,所以不惜去撼號稱獨立民主派安劍英。03件果陣,東涌都仲係蚊型新市鎮,當區有位有民望嘅教會神父又係做緊網絡社區,所以都好支持老記。誰不知大嚿出手,令李柱銘上書到教區秘書處,要求神父取消支持獨立民主派候選人。咁好啦,原本可以贏咗民建聯個周轉香呀嬸嘅格局,最後變攬炒。

選舉係4年一次,揀錯代表都叫仲有上訴機會,誰不知2007年選舉,東涌人繼續選個「建設派」周呀嬸。就係2007年果屆,個呀嬸代表晒東涌居民支持港珠澳大橋、東涌填海同第三條跑道喇。

時間再去到2011年,周轉香呀嬸已經喺東涌南各個屋邨屋苑插穩晒旗代表晒你。公民黨就派咗個區內互委會會長撼周呀嬸。果個時間,就係港珠澳大橋司法覆核被上訴庭決可以繼續興建之時。果次嘅區議會選舉,就正正係東涌人可以就港珠澳大橋表態。結果?東涌人埋怨朱綺華婆婆同公民黨破壞民生嘛,繼續俾周轉香大嬸做多一屆; 至於東涌其他新區,都係由「建設派」拎晒。

好了,到2015年,你哋東涌人忍昂坪360都有9年。一個土生土長東涌人王進洋出來參選,無人無物下硬撼百名義工坐鎮,家在愉景灣等坐周轉香果位嘅周浩鼎。結果你哋東涌人,都係揀咗周浩鼎。然後呢?鼎爺宣誓成為區議員後,就立即拋低東涌去選新東參加補選喇。雖然佢果仗輸俾楊岳橋,但鼎鼎同年年底用東涌區議員牌頭,成功做咗超區立法會議員了。

東涌人支持港珠澳橋頭經濟嘅政黨同議員,到今日「橋頭經濟」成型,可謂求仁得仁。整個東涌市中心已經是「橋頭經濟」的中心,你揀嘅願景已經實現咗喇。想買平嘢?過逸東啦;想有位食飯?去村屋啦;想睇戲?去機場啦。而家係「低增值人士請離開東涌市中心,騰出空間讓高增值人士進入」嘅黃金日子,有咩好投訴?周浩鼎好日都唔喺佢個東馬樓辦事處啦,仲投訴啲咩?你哋既然揀咗作他人衣裳,就係咁嫁喇。

喺呢度順便提提你,第三條跑填緊海喇,最快2023年啟用。各位家在東涌嘅「橋頭經濟」員工,等住共享中国人的榮耀吧!

關於作者:毒舌男
聽聞係某編輯分身,專用來出啲與編輯身份不符又得罪人嘅毒舌文


原文連結



0 comments:

Post a Comment