2018-11-08

【立場新聞】文科生習醫的奇幻旅程:心臟停頓時 CPR。係。唔。會。搓。死。人。 (3174)


自從消防處任何仁 campaign 出咗之後就好多網民批評話消防處條短片無教得好清楚全個急救程序。

首先文科生想講,消防處係教緊 C。P。R。同 A。E。D。唔係教緊你 basic life support(基本生命支援)同 Advance life support(高級生命支援)。

係幾分鐘短片洗唔洗教埋 DRABCDE,教埋 primary survey 同 secondary survey,trauma assessment?

最基本的
(1) 5cm 深度
(2) 1 秒 2 下
(3) 雙手合上
(4) AED 機貼 pad

全部係條短片同首歌都講得好清楚,首歌個 rhythm 同羅蘭姐的表演更異常地洗腦。

深度、深度、5cm 的深度仲用埋身份證長度做 reference。
速度、速度、一秒兩下的速度配合埋首歌的速度。
所有 key message 出哂,全港仲瘋傳,完美地做到 public health 的效果。

係香港,我地唔難發現仲會有些人經常會智者上身,當我地推廣疫苗時,會話疫苗會令人自閉、推廣 CPR 時,話會搓死人。Please, get your facts right。

當一個人係街外心跳停頓時,個人已經係臨床上死亡了(clinically dead),你係唔可能搓死一個已經臨床上死亡的人。就算救護哥哥八分鐘內到達,病人已經有八分鐘的腦部係缺氧。美國心臟病學會的研究話比我地聽院前路人 bystanders 心外壓(CPR)和使用 AED 係最能拯救心跳停頓的病人的方法。無嘢好得過最基本的 CPR 同 AED,即使無學過都可以提高生存機率。

好多時我哋都會慢慢建立咗「少做少錯」的概念,為咗怕出事而唔敢伸出援手。試想像下如果心跳停頓的是你愛人,而街上的路人無人敢伸出援手你又會有咩感覺?當有人想伸出援手時就有其他路人話「喂,你無救急牌會搓死人嫁」,而最後無搓到,你愛人失救而死,你會點諗?

今時今日,網上言論唔需要負責,但你要諗清楚當你在網上散播錯誤訊息的時候,個影響到底係乜嘢。我唔係好明白點解咁多持急救證書的網民會反對全民 CPR 並係咁 reinforce CPR 會搓死人。係咪個急救課程無講清楚 CPR 係搓唔死一個 cardiac arrest 的人,定係急救課程令佢哋有個莫名其妙的優越感,只准急救牌救人,唔准「任何仁」救人?

容許我再重申一次,some CPR is always better than no CPR。AED 的設計就係比路人同無受過訓練的人使用。圖文並茂你只需要跟住指示去貼,部機自己會分析電流再建議電擊。無論係街邊買菜的陳師奶、中環返 Big 4 的 OL 姐姐定係報紙檔的阿偉都會識得用。從今日開始唔好再怕會搓死人,「任何仁」都應該勇敢地伸出援手。

  • 好多人都擔心法律責任,香港雖然無 Good Samaritan Law,但係 common law 的制度底下,除非你故意傷害病人,否則急救一個心跳停頓的病人係難以負上任何的法律責任。當然希望政府可以立法清晰地保障市民
  • 強烈建議政府將急救納入中學課程達至全民急救
  • 香港可以提供更多門檻較低、好似外國的短期(1-2 日)CPR&AED 急救課程。老實講,現時市面上的急救課程要成 20 個鐘教一堆如何包三角巾同繃帶,到底吸引到幾多人去報讀?
  • 好多網民都話如果路人走去跟條短片救人會推死人,但從來無解釋點解會推死。好有素人父母的影子。

#任何仁
#全民CPR
#全民AED
#5cm的深度
#1秒2下的速度

作者 Facebook



原文連結



0 comments:

Post a Comment